١٩ پرۆژەیێن بەرهەمئینانا شیری ل پارێزگەها دهۆكێ هەنە
دلۆڤان ئاكرەیی
رێڤەبەرێ گشتیێ سامانی ئاژەلی ل پارێزگەها دهۆكێ دیاركر: ل قەزا شێخان یا سەر ب پارێزگەها دهۆكێ ڤە، زەڤیەكا خودانكرنا چێلان هەیە كو پتر ژ 300 چێلان بخۆڤە دگریت و ب دووڤ ستانداردێن جیهانی دهێتە برێڤەبرن و كێلگە د هەموو قۆناغێن بەرهەمئینانێ دا، ژ پاقژكرن و خودانكرنێ هەتا دگەهیتە سیستەمێ دۆشینا ئۆتۆماتیكی، مفا وەرگرتیە ژ نووترین تەكنەلۆژیا و ئەڤ چەندە ژی پشت راستیێ ددەتە بەرهەمئینانا شیرەكێ ساخلەم و ب كوالێتیەكا بلند شیر بەرهەم دهینیت.
رێدیر سدقی، رێڤەبەرێ گشتیێ سامانێ ئاژەلی ل پارێزگەها دهۆكێ بۆ رۆژنامەیا ئەڤرۆ گۆت: پشتی دەستبكاربوونا كابینا نەهێ یا حوكمەتا هەرێما كوردستانێ، گرنگیەكا زۆر ب كەرتێ چاندنێ و سامانێ ئاژەلی هاتیە دان و ئەڤ پیتەپێدانە ب رێیا دامەزراندنا چەندین پرۆژەیێن ستراتیژی و مەزن یێن سامانێ ئاژەلی ل پارێزگەها دهۆكێ و هەمی دەڤەرێن دی یێن هەرێمێ رەنگڤەدایە و گرنگی دانا حوكمەتا هەرێمێ ب كەرتێ چاندنێ و ئاژەلداریێ، پشكەكە ژ ستراتیژییا مەزنا حوكمەتێ بۆ فرەچەشنكرنا ژێدەرێن داهاتی و كێمكرنا پشت بەستنێ ب نەفتێ و د ڤی چارچۆڤەیی دا.
زێدەتر گۆت: حوكمەتێ كارئاسانیێن زۆر بۆ وەبەرهێنەرێن ناڤخۆ و بیانی كرینە دا كو وەبەرهێنانێ د بیاڤێ ئاساییشا خوارنێ دا بكەن و ئەڤ سیاسەتە بوویە ئەگەر كو هەرێما كوردستانێ د چەند سالێن بوری دا، زێدەباری پڕكرنا پشكەكا زۆر یا پێدڤیێن ناڤخۆ، دەست ب هناردەكرنا بەرهەمێن وەك هەنار، هنگڤین و پەتاتان بۆ بازارێن كەنداو و ئەوروپا بكەت، كو ئەڤە گاڤەكا گرنگە بەرەڤ بێهێزكرنا ژێرخانا ئابووری یا هەرێمێ.
رێدیر سدقی، ئاشكرا ژی كر: ل سەر ئاستێ پارێزگەها دهۆكێ، 19 پرۆژەیێن هەڤشێوە یێن بەرهەمئینانا شیرەمەنیێ هەنە و ئەڤ پرۆژە سالانە ب كۆم نێزیكی 55 ملیۆن لیترێن شیری بەرهەم دهینن، ب ڤێ چەندێ ژی نێزیكی 60% بۆ 65% ژ پێتڤیێن پارێزگەها دهۆكێ دابین دكەن.
