٢٩ ڕۆژنامه‌ڤان د شەڕێ ئسرائیلێ و حه‌ماسێ دا هاتینە کوشتن
ب، سه‌رجان مەحمود:
لژنا پاراستنا رۆژنامه‌ڤانان (CPJ) د داخۆیانیه‌کێ دا راگه‌هاند کو ژ رۆژا 2023/10/7 یا ده‌ستپێکرنا شه‌رێ د ناڤبه‌را ئسرائیلێ و حەماسێ دا ب گشتی 29 رۆژنامه‌ڤان هاتینە کوشن، هه‌شت رۆژنامه‌ڤان بریندار بووینه و هەتا نها چارەنڤیسێ 9 رۆژنامەڤانان ژی دیار نینە.
لیژنا پاراستنا رۆژنامه‌ڤانان هه‌روه‌سا راگه‌هاند ژی کو ئالیێن شه‌ری ڕێز ل مافێن رۆژنامه‌ڤانان ناگرن و هه‌ر ئالیێ کو ب زانه‌بوون ئێرشی رۆژنامه‌ڤانان بکەت، تاوانێن شه‌ری ئه‌نجام دده‌ت و ئەم ئێرشێن ل سەر رۆژنامەڤان ب توندی شەرمزار دکەین و دڤێت هەموو ئالی رێزێ ل رۆژنامەڤانان و کارێن وان بگرن.
سازیا ناڤهاتی د پشکه‌کا دی یا داخۆیانیا خوه دا راگه‌هاند ژی کو ژ سالا 1992 هه‌تا نها ئه‌ڤ جارا یه‌کێ یه د ناڤ سێ حه‌فتیان دا هژمارەک زێدە رۆژنامه‌ڤان دهێنه کوشتن و رۆژ ب رۆژێ ژی ئێرشێن ل سه‌ر رۆژنامه‌ڤانان دژوارتر دبیت. پێدڤیا جیهانێ ب نووچه‌یێن ڕاست و دروست هه‌یه و هه‌که رۆژنامه‌ڤان ب ئازادانه کارێن خوه ئه‌نجام نەدەن وی دەمی دەنگوباسێ راست ناگەهنە دەستێ خەلکی، ژ بەر ڤێ یەکێ ژی دڤێت هەموو ئالی رێزێ ل رۆژنامەڤانان و کارێن وان بگرن، براستی ژی گرنگە هەموو ئالی رۆژنامەڤانان بپارێزن.
د دووماهیا داخۆیانیێ دا ژی هاتیه دیار کرن کو د شه‌رێ د ناڤبه‌را ئسرائیلێ و حه‌ماسێ دا وه‌لاتیێن سڤیل دبنه قوربانی و دڤێت جیهانا پێشکه‌فتی زێده‌تر هاریکاریا خەلکێ سڤیل بکەت.
ل ئالیێ دی بەرپرسەکێ نەتەوەیێن ئێكگرتی ژی راگەهاند هەتا نها پتر ژ بیست کارمەندێن وان د شەرێ نها یێ د ناڤبەرا ئسرائیلێ و حەماسێ دا هاتینە کوشتن، کارمەندێن وان تنێ کارێن مرۆڤاتیێ دکەن و مخابن بووینە قوربانی و ژ بەر شەری ژی ئەو نەشێن هاریکاریا خەلکێ سڤیل ل غەزە بکەن، دڤێت شەر بهێتە راگرتن یان ژی رێیەکا ساخلەم بهێتە ڤەکرن دا سازیێن مافێن مرۆڤی و رێکخستنێن دی بشێن هاریکاریێن مرۆڤی بگەهیننە غەزە، براستی ژی د رەوشا نها دا هاریکاری وەکو پێدڤی ناگەهنە دەستێ خەلکێ سڤیل ل غەزە.
هەمان بەرپرسی ئەو یەک ژی دیار کریە، ژ بەر شەری نەخوەشخانە ژناڤ چووینە، دەرمان نەماینە، ئاڤا ڤەخوارنێ و پێدڤیاتێن سەرەکی یێن ژیانێ ل بەر دەستێ خەلکی نینن، خەلک پێدڤی ب هاریکاریانە و ژ بەر ڤێ یەکێ ژی دڤێت هەر دو ئالیێن شەری رەوشا ژیانا خەلکێ سڤیل بدەنە بەرچاڤ، مخابن د ئەنجاما شەرێ چەندین رۆژێن بۆری دا هەتا نها چەند هزار وەلاتیێن سڤیل بووینە قوربانی و بەردەوامیا شەڕی دێ وەسا کەت هژمارا قوربانیان زێدەتر لێ هێت.
