٩٠% بالندە و تەیر و تەوال ب فرۆكەیێ دهێنە هەرێما كوردستانێ
، هەرهین محەمەد:
خودانێن جهێن فرۆتنا بالندە و تەیر و تەوالان دیاردكەن، 10% ب قاچاخی دهێن و پتریا وان ژی هەر ل هەرێما كوردستانێ زێدەدكەن، بەلێ پشتی ئەڤان كاودانێن ب سەر هەرێما كوردستانێ دا هاتین و مووچە نەهاتینە دان، بازار گەلەك لاوازبوویە و خەلك بالندە و گیانەوەران كێم دكرن و ل سەر كیستێ خوە كریێ ددەن.
نەشوان جەمال، خودانێ جهەكێ فرۆتنا بالندایە ل بازارێ دهۆكێ و ئەڤە 18 سالە یێ بەردەوامە ل سەر وی كاری و دبێژیت: 90% ژ بلندە و تەیر و تەوالان ژ وەلاتێن بیانی ب فرۆكێ دهێن و هندەك ژ وان ژی ل دهۆكێ زێدەدبن وەكو غەندور و تیوروئەلحب و ڤنجس و بەبەغا و 10% ب قاچاخی دهێن وەكو بابەغایان، بەلێ نوكە ل ئیراقێ بخۆ زێدەدكەن و ئەو داهاتە ناچیتە ژدەرڤە و ئەرزان بۆ وان دكەڤن.
زێدەتر گۆت: ئەڤ بالندەو گیانەوەرە پتریا وان ئەون دناڤ مالان دا دهێنە بخودانكرن و خەلكێ مە ژی گەلەك حەز ژ تشتێ كەهی دكەت، بەبەغا و كوكتێل و پشیك و بلبلێن خۆرمێ.
ڤەدەر سالم مستەفا، ماموستایێ پەیمانگەها ئامێدیێ دبێژیت: گەلەك تشت وەكو بالندە ژ دەرڤەی وەلاتی دهێن و ئەم یێن بووینە مشەخۆر و نەبووینە بەرهەمهێنەر و دڤێت ژ بۆ ئەڤێ چەندێ قانونەك ل پەرلەمانی بهێتە دەركرن و گۆت: گەلەك یا گرنگە مرۆڤ بەرهەمێ خوە ل وەلاتێ خوە بخوە زێدەبكەت و هەكە ئەم گەلەك كاران نەزانین ژی دڤێت ئەم چاڤلێكەرێن وان وەلاتا بین یێن د ئەڤان كاران دا سەركەفتن ئینای.
