٩٠% ژ پشكدارێن ئاڤێ ل سەنتەرێ دهۆكێ پیڤەرێن ئاڤێ گرێداینە
ئەڤرۆ
ئەمیر ئەترووشی
رێڤەبەرێ ئاڤا دهۆكێ راگەهاند، گرێدانا پیڤەرێن ئاڤێ ب رێژەیەكا مەزن بەرەڤ زێدەبوونێ یە و هەتا نوكە ب رێژا 90% ژ پشكدارێن ئاڤێ ل سەنتەرێ باژێرێ دهۆكێ پیڤەرێن ئاڤێ گرێداینە و گۆت: حۆكمەتا هەرێما كوردستانێ مەزاختنەكا مەزن د دابینكرنا ئاڤا ڤەخوارنێ دا دكەت هەتا ئاڤ بۆ هاوولاتیان دهێتە دابینكرن، بۆ نموونە مەزاختیێ ئێك مەترا چوار گۆشە یا ئاڤێ ل سەر حۆكمەتێ 632 دینارن.
ئەندازیار ڤەگیر ئەحمەد، رێڤەبەرێ ئاڤا دهۆكێ بۆ رۆژناما ئەڤرۆ دیار كر، 90% یا خەلكێ دهۆكێ پیڤەرێن ئاڤێ گرێداینە و ب تنێ دەوروبەرێن باژێرێ دهۆكێ ماینە وەك زاویتە و مانگێشكێ پێگیریێ ب دانانا پیڤەران ناكەن و گۆت: دخوازم خەلكێ دهۆكێ پێگیربیت ب رێنمایێن حوكمەتێ و پیڤەرا گرێدەن و ئاڤا كێم ب مەزێخن و پیڤەری گرێدەن دا ئابووریێ د ئاڤێ دا بهێتەكرن، ئەڤ سالە ل گشت عیراقێ ئاریشێن ئاڤێ گەلەك هەبوون و ب تنێ باژێرێ دهۆكێ نەبیت، ئەڤە ژی بۆ پێگێریا خەلكێ مە دزڤریت، لێ مە بەردەوامی دڤێت.
داخاز ژ حوكمەتا هەرێما كوردستانێ دكەم ل گەل فەرمانگەهێن مە د هاریكاربن بۆ زێدەكرنا ستافێ پێدڤی و دیسا زێدەكرنا پێشینا هەیڤانە یا رێڤەبەریێ، دا پتر خزمەتا خەلكێ خوە بكەین و ئەڤە ژ كارێن فەرە ژلایێ وەزارەتێ ڤە بهێنە ئەنجامدان.
زێدەتر گۆت: حۆكمەتا هەرێما كوردستانێ مەزاختنەكا مەزن د دابینكرنا ئاڤا ڤەخوارنێ دا دكەت هەتا ئاڤ بۆ هاوولاتیان دهێتە دابینكرن، بۆ نموونە مەزاختیێ ئێك مەترا چوار گۆشە یا ئاڤێ ل سەر حۆكمەتێ 632 دینارن.
ناڤبری گۆت: یاسایا هژمارە (4) ئەڤ سالە دەركەفتیە و دبیتە یاسایا بنكە و پاراستنا تۆرێن ئاڤێ وەك هەر یاسایەكێ ژ پەرلەمانی دەركەفتیە و ئەگەر تەوافێ و هەر زێدەگاڤیەكێ ل سەر ئاڤێ بكەی بێ گومان دێ هێیە سزادان، داخوازێ ژ هەمی خەلكی دكەم هەكە زێدەگاڤیەك ئەنجام دابیت بلا راكەت، بەری حوكمەت دووڤچوونێ بكەت و سزا بدەت و بلا تەوافێن ئاڤێ بدانن و هەبوونا تەوافێن ئاڤێ ناهێلیت ئاڤ زێدە بچیت و پیڤەرێن ئاڤێ گەلەك بخوینن و ناهێلن ئاڤا زێدە بچیت و كونترۆل ل سەر دهێتەكرن.
هێشتا گۆت: رێنمایێن سالا 2018 هەنە و سالا 2021 ژی هاتینە راستڤەكرن و دەمێ پرۆژێن وەبەرهێنانێ دهێنە دروستكرن وەك رێڤەبەریا ئاڤێ ب رێكا وەزارەتا باژێرڤانیێ داخاز دكەین وەك ژێدەرێ ئاڤێ بكەڤیتە دەستێ مە، چونكە ئاڤ وەك سامانەكێ نەتەوەیی و سەر ب حوكمەتێ ڤەیە و مافێ وەلاتیان ناهێتە خوارن و دڤێت ئاڤ دەستێ حوكمەتێ دا بیت، هەر پرۆژەكێ بهێتەدانان نەشێـت چ كارا بێی فەرمانگەهێن پەیوەندار نەشێت بكەت و دڤێت هەر ل دووڤ رێنما بیت وەك كارەب و ئاڤ و دڤێت ل دووڤ رێنمایێن حوكمەتێ بیت.
