پاراستنا ئاسایشا ره‌وشه‌نبیری ئه‌ركه‌كێ قورسه
ل ده‌مێ چه‌ند رۆژێن بۆری مێدیایێن ناڤخۆیی و هنده‌ك ژ مێدیایێن بیانی، پرسا قه‌ده‌غه‌كرنا چه‌ند كتێبان ژ ئالیێ وه‌زاره‌تا ره‌وشه‌نبیری و لاوان وه‌ك مانیشێت، نووچه، راپۆرت و مژارا دانوستانێ به‌لاڤكرن. ل ده‌ستپێكێ دخوازم بێژم، كریارا و پێنگاڤا وه‌زاره‌تا ره‌وشه‌نبیری و لاوان وه‌ك سازیه‌كا حكومی یا به‌رپرس د ڤێ وارێ دا كاره‌كێ پێدڤی بوو و پێویسته وه‌زاره‌تا ره‌وشه‌نبیری و لاوان به‌رده‌وام ئه‌ركێ خوه جێبه‌جێ بكه‌ت كو به‌رپرسه بۆ پاراستنا ئاسایشا ره‌وشه‌نبیری و هزری لێپرسینێن ره‌وشه‌نبیری بكه‌ت. هه‌رچه‌نده كاره‌كێ قورسه و حكومه‌ت هه‌ڤریش هنده‌ك پرسگرێكان دبه و هنده‌ك لایه‌ن ڤی كاری وه‌ك ده‌ستێوه‌ردان و سانسوور ل قه‌له‌م دده‌ن. لێ ئه‌ڤ كاره سرۆشتی و ساخله‌مه، نها پرانیا ده‌وله‌تێن جیهانێ ڤی كاره‌ی دكه‌ن، ب تایبه‌تی پشتی به‌ربه‌لاڤبوونا هزر و ئایدلۆژیایێن توندره‌و و هزر و پرۆژه‌كتێن تیرۆریستی. ل وه‌لاتێن هه‌ره پێشكه‌فتی نه ته‌نێ ئه‌و كتێبێن كو هانا توندوتیژیێ دده‌ن دهێنه قه‌ده‌غه‌كرن، به‌لكو گشت دیارده‌یێن هانا ره‌گه‌زپه‌ره‌ستی و دووبه‌ره‌كیێ دده‌ن هاتنه قه‌ده‌غه‌كرن، چونكو دزانن ل پشت هه‌ر كریاره‌كا سیاسی گۆتن و تێكسته‌كا سیاسی هه‌یه و ئه‌و دیارده‌یێن هه‌نێ پتر كو دیارده كه‌سوكی بن، دیارده‌یێن سیاسی نه و مافێ هه‌ر جڤاكه‌كێ یه كو سه‌قامگیرییا خوه یا سیاسی و جڤاكی بپارێزیت و ب پله‌یا ئێكان میكانیزم و ئالاڤێن چاندی و ره‌وشه‌نبیری بگریته‌به‌ر. پێویسته ئه‌م هنده‌ك پرسیاران ژ وان سازی و ده‌زگه‌هێن چاپه‌مه‌نی و به‌لاڤكرنێ بكه‌ین بتایبه‌تی ئه‌وێن ل كوردستانێ هه‌نه، دگه‌ل ده‌زگه‌هێن بیانی یێن كو ل كوردستانێ به‌شدارێ پێشانگه‌هێن كتێبان دبن. ئه‌رێ مه پێدڤی ب چ كتێبان هه‌نه، ئه‌ڤ كتێبه یان یا هه‌نێ چ سود و مفایه‌ك بۆ خوینده‌ڤان و عه‌قلێ كوردی هه‌ی؟ ئه‌رێ ئه‌ڤ توندوتیژییا د ده‌ڤه‌را رۆژهه‌لاتا ناڤین سه‌رهه‌لدایه و كارێن تیرۆرستی و شه‌رێن ئایینی و مه‌زهه‌بی كو ل ده‌ڤه‌رێ و جیهانێ هه‌یه، ل سه‌ر چ پرۆژه‌كتێ هزری هاتنه ئاڤاكرن؟ پێدڤییه بزانن كو هه‌رێما كوردستانێ نابه باژێرێ كتێبێن هه‌نێ. راسته ل هه‌رێما كوردستانێ چ سانسوور ل سه‌ر ئازادیا ده‌ربرینی نینه، لێ ئه‌ڤه ب مانایا ڤێ چه‌ندێ نییه كو رێ ل به‌لاڤكرنا هزرا گاوه‌ر كرنا و ل ناڤبرنا ئه‌وێ دی بهێ دان، پێدڤییه هه‌ر یه‌ك ژ مه سنوورێن ئازادییا خوه بزانیت و نابه ل ژێر په‌رده‌یا ئازادییا ده‌ربرینێ، ئازادیێن ئه‌وێن دی بنپێ بكه‌ین، یان هه‌بوونا وی بێخینه ژێر گه‌ف و مه‌ترسییان. مه پێدڤی ب وان كتێب و ژێده‌ران هه‌یه كو كار ژ بۆ ب هه‌ڤره‌ژیانا ئاشتیانه و هه‌ڤدو قه‌بولكرنێ و چاندنا روحا لێبوورده‌یی د عه‌قل و هزار گشتی دا دكن. ئه‌ڤه چه‌ند ساله ده‌زگه‌هێ ئه‌لمه‌دا پێشانگه‌ها ناڤده‌وله‌تیا كتێبان ل هه‌ولێرێ ساز دكه‌ت و سالانه چه‌ندین كتێبێن كو ب ئاشكرا ره‌واتیێ دده‌نه كارێن توندوتێژی دهێنه نمایشكرن و هنده‌ك ژ وانا ل گشت ده‌وله‌تێن جیهانێ قه‌ده‌غه‌نه و ل پێشانگه‌هێن ئه‌لمه‌دا ل هه‌ولێرێ دهێنه فرۆتن كو دهێ گۆتن ئه‌ڤ كتێب ب رێكێن قاچاغ بۆ ده‌وله‌تێن دن دهێنه ڤه‌گۆهاستن. هه‌ر ژبه‌ر رڤێ یه‌كێ پێویسته وه‌زاره‌تا ره‌وشه‌نبیری و سازیێن په‌یوه‌ندیدار ل حوكمه‌تا هه‌رێما كوردستانێ پتر گرنگیێ ب ڤێ مژارێ بده‌ن و به‌رده‌وام هایدارێ به‌رهه‌مێن نڤیسكارێن رادیكال ببین و نه‌هێلن ڤایروسا هزرێن وان بگه‌هنه كوردستانێ و گه‌نجێن مه تووشێ نه‌خۆشیا تۆندره‌ویێ ببن و بكه‌ڤنه ژێر باندۆرا هزر و كه‌سینیا وان. ئیرۆ كوردستان و ده‌ڤه‌را رۆژهه‌لاتا ناڤین ب گشتی تووشێ قه‌یران و جه‌نگه‌كێ مه‌زن و خۆینه‌لو بوویه و رۆژانه چه‌ندین گه‌نجێن مه شه‌هید دبن و دبنه قوربانی، پێشمه‌رگه ب چه‌ك به‌ره‌ڤانیێ ل ئاخا كوردستانێ دكه، لێ ژ بۆ به‌رهنگاربوونا ڤێ نه‌خۆشیا و پارستنا كوردستانێ پێدڤی یه دگه‌ل ره‌وتێ ئیسلاما رادیكال و توندره‌و شه‌ره‌كێ هزری و ره‌وشه‌نبیری ژی بهێته كرن و یه‌ك ژ ئالاڤێن ڤی شه‌ری ژناڤبرن و قه‌ده‌غه‌كرنا وان په‌رتووكایه كو هانا توندوتیژیێ دده‌ن.
