پاراستنا ژینگەهێ ژ خێزانێ دەستپێدکەت
بێوار حەمدی:
ماموستایەکێ زانکۆیێ دیار کر کو پێدڤییە خێزان بهایێن ژینگەھ پارێزیێ دناڤ هزر و رەفتار و ڕەوشتێن زارۆکی دا بچینیت، چالاکڤانەکێ جڤاکی ژی گۆت: پتریا دایک و بابا د بوارێ ژینگەھ پارێزیێ دا د شارەزا نینن.
زێرەڤان ئەمین، ماموستایێ زانکۆیێ و تایبەتمەندێ ئاشتی و مافێ مرۆڤی بۆ ڕۆژنامەیا ئەڤرۆ دیار کر کو خێزانێ ڕولەکێ مەزن هەیە د بنیات دانانا هشیاریا ژینگەهێ ژ بۆ زارۆکان و گۆت؛ مخابن گەلەک خێزان بەرپرسایەتیا ژینگەهێ ژبۆ فێرکرنا زارۆکی ب ستویێ خۆڤە ناگرن، لێ جاران فشارێن جڤاکی و ئابوری ژبۆ هندەک خێزانان بوینە بارگرانی کو د ڤی بواریدا دچالاک بن.
ماموستایێ زانکویێ د بەردەوامیا ئاخفتنێن خۆدا دیار کر کو پێدڤییە هەر ژ دەسپێکێ خێزان زارۆکی فێری بهایێن پاراستنا ژینگەهێ بکەت و گرنگیا ژینگەهێ دناڤ هزر و رەفتاڕ و ڕەوشتێن زارۆکی دا بچینیت و گۆت؛ گەلەک جاران زارۆک بنەمایێن پاراستنا ژینگەهێ ژ هندەک چالاکیان فێر دبیت وەکو چاندنا کەسکاتیان، ژێک جوداکرنا بەرمایکان .
دەرونناس ئەڤیندار زۆبێر، سەبارەت هەمان بابەت دیار کر کو ئێکەم پێنگاڤ ژبۆ پاراستنا ژینگەهێ ژ خێزانێ دەستپێدکەت و خێزان وێ بەرپرسایەتیێ وەردگریت و گۆت؛ ژینگەهێ کارتێکرنەکا ڕاستەوخۆ لسەر دەروونێ مرۆڤی هەیە، ژبەرکۆ قەلەقێ و دودلیێ لدەڤ مرۆڤی کێم دکەت، بتایبەت هەکە دناڤ ژینگەهەکا ساخلەم و تژی داروبار دابیت.
دەرونناسێ دیار کر ژی کو گەلەک جاران دەمێ مرۆڤ دمینتە دخانیڤە بێهنا مرۆڤی تەنگ دبیت و قەستا ناڤ باخچێ مالێ یان ژدەرڤە دکەت داکو دەروونێ خۆ ئارام بکەت، لەوما مالەکا تژی داروبار و کەسکاتی ب گشتی پتر خۆشیێ و بێهنفرەهیێ ددەتە مرۆڤی و زارۆک پتر فێر دبیت.
سەفەر ئەیوب، چالاکڤانێ جڤاکی گۆت؛ بدیتنا من هەتا نوکە د جڤاکی دا پتریا خێزانان نەشیاینە زارۆکێن خۆ دگەل بهایێن کارتێکەر یێن پاراستنا ژینگەهێ بدەنە نیاسین، ژبەرکو پتریا دایک و بابان خۆ د بوارێ ژینگەھ پارێزیێ دا شارەزا نەکریە.
چالاکڤانێ جڤاکی ئەو چەندە ژی دیار کر کو، دەمێ ئاخفتن لسەر پاراستنا ژینگەهێ و پەروەردەکرنا نفشەکێ ژینگەھ دوست دهێنە گۆتن خالا ئێکێ ژ خێزانێ دەسپێدکەت و گۆت؛ چونکە زارۆک بەری فێری ئاخفتنێ ببیت فێری دیتنێ و رەفتارێن بەرامبەر دبیت.
