پارتا کـۆمـاری پشتەڤـانیێ ل پەروەردەیا ب زمـانێ کـوردی دکـەت
سەرۆکێ پارتا کۆماری یا گەل دیار دکەت وان دڤێت ل پەرلەمانێ تورکیا پرسا کوردی بهێتە چارەسەرکرن و وەکو پارتا کۆماری ئەو پشتەڤانیێ ل پەروەردا ب زمانێ کوردی ل تورکیا دکەن و دڤێت گرتیێن سیاسی ژی بهێنە ئازاد کرن.
ئۆزگور ئۆزەل سەرۆکێ گشتی یێ پارتا کۆماریا گەل ل تورکیا دیار کر، وەکو پارتا کۆماری ئەو پشتەڤانیێ ل چارەسەرکرنا پرسا کوردی ل تورکیا دکەن، لێ دڤێت پرسا کوردی ل پەرلەمانێ تورکیا و ب رێیا گوهۆڕینێن قانوونی بهێتە چارەسەرکرن، نابیت ب نهینی و ل پشت دەرگەهێن گرتی بەحسێ چارەسەرکرنا پرسا کوردی بهێتە کرن و گۆت: (بێگومان دڤێت بابەتێ پێناسەیا وەلاتیبوونێ ژ نوو ڤە بهێتە کرن، هەروەسا دڤێت گەلەک گوهۆڕینێن دی ژی بهێنە کرن و وەکو پارتا کۆماری ئەم پشتەڤانیێ ل پەروەردا ب زمانێ کوردی دکەین، لێ ژ بۆ ڤێ یەکێ ژی دڤێت ل پەرلەمانی ب رێیا ئاڤاکرنا هندەک لیژنەیان ئەڤ کارە ب قانوونی بهێتە کرن).
سەبارەت ب سیاسەتا دەرڤە یا تورکیا ژی ناڤهاتی دیار کر، تورکیا د سیاسەتا دەرڤە دا تووشی قەیرانەکا مەزن بوویە و دڤێت سیاسەتا دەرڤە ژ نوو ڤە بهێتە دارێتن و گۆت: (سەبارەت ب سووریێ و کوردان ژی وەکو پارتا کۆماری مە دڤێت سیستەمێ بهێت یێ سووریێ سیستەمەک دیموکراتی بیت و تورکیا دشێت ل گۆر گوهۆڕینێن ل سووریێ سیاسەتا خوە ل هەمبەر کوردان ژی ل بەرچاڤ دەرباز بکەت، لێ جارێ گەلەک زوویە بەحسێ دانوستاندنان ل گەل پەیەدێ بهێتە کرن).
سەرۆکێ پارتا کۆماریا گەل سەبارەت ب ئیراقێ و هەرێما کوردستانێ ژی دیار کر، دڤێت تورکیا پەیوەندیێن خوە ل گەل هەرێما کوردستانێ باشتر لێ بکەت و ئەو یەک د بەرژەوەندیا تورکیا دایە، بەری نها هندەک ئالۆز هەبوون لێ نها پەیوەندیێن تورکیا و هەرێما کوردستانێ گەلەک باشن و دڤێت باشتر ژی ببن و ئەو یەک ژ بۆ تورکیا و سیاسەتا وێ ل رۆژهەلاتا ناڤین گەلەک یا گرنگە.
ئۆزگور ئۆزەل د دووماهیا ئاخڤتنا خوە دا ئەو یەک ژی دیار کر، دڤێت هەموو گرتیێن سیاسی ل تورکیا بهێنە ئازاد کرن، من بەری نها سەرەدانا دەمیرتاشی ژی کریە، هەلوەستێ دەمیرتاشی ژ بۆ دیموکراسیا تورکیا گەلەک گرنگە، مە بەری نها ژی دیار کریە و جارەکا دی دبێژین کو جهێ دەمیرتاشی ل زیندانێ نینە، دڤێت دەمیرتاش و ئەکرەم ئیمام ئۆغلۆ و هەموو گرتیێن سیاسی ل تورکیا بهێنە ئازاد کرن، هەکە مە بڤێت تورکیا ببیتە وەلاتەک دیموکرات و ئازاد دڤێت، ئەم رێزێ ل هەموو نێرینێن جودا یێن سیاسی بگرین و نابیت چو کەسەک ژ بەر هزرێن خوە یێن سیاسی بهێتە گرتن، ژ بەر ڤێ یەکێ ژی دڤێت هەموو گرتیێن سیاسی ل تورکیا بهێنە ئازاد کرن.
