پارتـا دەم ستراتیژیا خـوە ل هـەمبەر دەستهەلاتێ یا گـوهـۆڕی
سەرۆکێ گشتی یێ پارتا کۆماری ل تورکیا راگەهاند، بەری نها هەدەپێ کار بۆ گوهۆڕینا دەستهەلاتا ئەردۆغانی دکر، لێ پارتا دەم ستراتیژیا خوە یا ل هەمبەر دەستهەلاتا ئەردۆغانی گوهۆڕیە و نەڤێت دەستهەلاتا نها ژناڤ بچیت و ستراتیژیا وان خزمەتا ئەردۆغانی دکەت.
ئۆزگور ئۆزەل سەرۆکێ گشتی یێ پارتا کۆماری ل تورکیا د داخۆیانیەکێ دا سەبارەت ب هەلبژارتنێن باژێرڤانیان ل تورکیا دیار کر، د ڤان هەلبژارتنان دا ب تایبەتی ژی ل باژێرێن مەزن یێن تورکیا دێ هندەک گوهۆڕین دروست بن، چونکی د هەلبژارتنێن بەری چار سالان دا دەنگدەرێن هەدەپێ کو نها بووینە دەنگدەرێن پارتا دەم، پشتەڤانی ل بەربژارێن پارتا مە ئانکۆ پارتا کۆماری کرن و گۆت: (ژ بەر پشتەڤانی و دەنگێن کوردان مە شیا هەر دو باژێرڤانیێن ئستەنبول و ئەنقەرە ژ دەستێ ئاکپارتیێ دەرخینین، لێ نها رەوشەکا نوو هاتیە پیش، چونکی پارتا دەم ستراتیژیا خوە ل هەمبەر دەستهەلاتا ئەردۆغانی یا گرهۆڕی، هەدەپێ ب هەموو رەنگەکێ کار دکر دا دەستهەلاتا ئەردۆغان ژناڤ بچیت، لێ پارتا دەم ستراتیژیا خوە گوهۆڕیە و کار بۆ ژناڤبرنا دەستهەلاتا ئەردۆغانی ناکەت، ژ بەر ڤێ یەکێ ژی مە دیت پارتا دەم ل پرانیا باژێرێن تورکیا بەربژارێن خوە هەنە، ستراتیژیا نها یا پارتا دەم تا رادەیەکێ مەزن د خزمەتا ئەردۆغانی و پارتا وی دایە).
سەرۆکێ گشتی یێ پارتا کۆماری ئەو یەک ژی دیار کر، هندەک هێزێن دی ل تورکیا کو بەری نها دژبەریا ئەردۆغانی دکرن ژی ئەڤرۆکە ل هەمبەر وی بێدەنگ بووینە یان ژی پشتەڤانیێ لێ دکەن، دیارە وان هێزان ژی دڤێت ب رێیا ئەردۆغانی بگەهنە هندەک پۆستان و ژ بۆ بەرژەوەندیێن خوە ئێدی وەکو جاران دژبەریا دەستهەلاتێ ناکەن و خوە ژ مە ژی دوور کرینە و گۆت: (لێ ستراتیژیا پارتا کۆماری ل هەمبەر دەستهەلاتێ نەهاتیە گوهۆڕین، پارتا کۆماری ب هەموو رەنگەکێ دڤێت پێگەهێ خوە ل تورکیا بهێز بکەت، مە دڤێت د ڤان هەلبژارتنان دا رێژەیا دەنگێن خوە زێدەتر لێ بکەین).
ئەو یەک د دەمەکێ دایە پشتی هەلبژارتنێن پەرلەمانی و سەرۆک کۆماریێ ل تورکیا، گەلەک سیاسەتمەدارێن کورد وی دەمی سیاسەتا هەدەپێ ب توندی رەت کرن و دیار کرن، پشتەڤانیا هەدەپێ یا بۆ پارتا کۆماری و کلچدار ئۆغلۆیی چو ئەنجامێن خوە نەبوون و هەتا رێژەیەکا مەزن ژ دەنگدەرێن کورد وەکو نەرازیبوون ل هەمبەر سیاسەتا هەدەپێ دەنگێن خوە نەدانە وێ پارتیێ، ژ بەر ڤێ یەکێ ژی نها پارتا دەم ستراتیژیا خوە گوهۆڕیە و پشتەڤانیێ ل بەربژارێن پارتا کۆماری ناکەت و ل پرانیا باژێرێن تورکیا بەربژارێن خوە هەنە، چاڤدێرێن سیاسی ژی وەسا دبینن د دەمەکێ وەسا دا ل ئستەنبول و ئەنقەرە ئاکپارتی دێ سەرکەڤیت.
