پارتی: ل گه‌ل هه‌لبژارتنێن پێشوه‌خت ل عیراقێ نینین
ئه‌ڤرۆ:
به‌رپرسێ ده‌زگه‌هێ هه‌لبژارتن یێ پارتی دیموكراتی كوردستان، خسرۆ گۆران، راگه‌هاند د نوكه ئه‌م ل گه‌ل هه‌لبژارتنێن پێشوه‌خت دا نینین، به‌لێ هه‌كه بهێنه ئه‌نجامدان ژی دێ د پێگیر بین.
خسرۆ گۆران، به‌رپرسێ ده‌زگه‌هێ هه‌لبژارتن یێ پارتی دیموكراتی كوردستان گۆت ژی” ده‌مه‌كه داخوازا ئه‌نجامدانا هه‌لبژارتنێن پێشوه‌خت ل عیراقێ دهێته كرن، كو ژ بلی لێڤه‌گه‌رێ شیعێن عیراقێ، ئه‌مریكا و رێكخراوا نه‌ته‌وێن ئێكگرتی ژی داخوازا هه‌لبژارتنێن پێشوه‌خت بۆ عیراقێ دكه‌ن، چه‌ندین جاره بابه‌تێ هه‌لبژارتنێن پێشوه‌خت ل عیراقێ دهێته به‌حسكرن، به‌لێ هه‌تا نوكه چو بریاره‌ك نه‌هاتیه دان بۆ ئه‌نجامدانا هه‌لبژارتنێن پێشوه‌خت”.
ل دۆر هه‌لویستێ پارتی دیموكراتی كوردستان ل دۆر ئه‌نجامدانا هه‌لبژارتنێن پێشوه‌خت ل عیراقێ، به‌رپرسێ ده‌زگه‌هێ هه‌لبژارتن یێ پارتی ئه‌وژی گۆت” ئه‌م پشكه‌كه‌ین ژ په‌رله‌مانێ عیراقێ و هه‌كه بریارا ئه‌نجامدانا هه‌لبژارتنێن پێشوه‌خت بهێته دان، دێ هه‌موو لایه‌ن ب بجهئینانا وێ بریارا پێگیر بن، به‌لێ وه‌كو پارتی دیموكراتی كوردستان ئه‌م ل گه‌ل وێ چه‌ندێ نینین هه‌لبژارتنێن پێشوه‌خت ل عیراقێ بهێنه ئه‌نجامدان، به‌لێ هه‌كه بریارا ئه‌نجامدانا وان بهێته ده‌ركرن، ئه‌م ژی دێ بجهئینین”.
خسرۆ گۆران دوپاتكر كو د هه‌لبژارتنێن بۆری یێن عیراقێ دا، ل هه‌رێما كوردستانێ چو كێشه نه‌بوو، به‌لێ هه‌كه ل ده‌ڤه‌رێن دی یێن عیراقێ كێشه هه‌بن، په‌یوه‌ندی ب مه‌ڤه نینه وه‌كو هه‌رێما كوردستانێ، هه‌تا نوكه ژی یا دیار نینه كا ئایا خوه‌نیشاده‌ر دێ ب حوكمه‌تا نوو یا عیراقێ رازی بن یان ژی د رژدن ل سه‌ر ئه‌نجامدانا هه‌لبژارتنێن پێشوه‌خت، به‌لێ ئه‌وله‌ویه‌ت بۆ پێكئینانا حوكمه‌ته‌كا نوو ئه‌وه كو به‌ربژارێ وه‌رگرتنا پۆستێ سه‌رۆكێ وه‌زیران سه‌ر ب چ لایه‌نێن سیاسی ڤه نه‌بیت، هه‌كه ئه‌و چه‌نده نه‌هاته كرن، پاشی دێ بریار هێته دان كا چ بهێته كرن بۆ ئێكلاكرنا كێشێ”.
