پارتی یا رژدە ل سەر چارەكرنا ئاریشەیا مووچەیێ فەرمانبەران
هەولێر، قائید میرۆ:
پەرلەمانتارەكێ پارتی ئاشكرا كر، د دەمەكێ نێزیك دا قانوونا بودجەیا گشتی یا ئیراقێ دێ هێتە راستڤەكرن و پارتی یا رژدە ل سەر چارەكرنا ئاریشەیا مووچەیێ فەرمانبەران، ئەو ژی ب رێیا راستڤەكرنا قانوونا بودجەیێ ل گورەی رێككەفتنا هەرێم و بەغدا.
شێروان جەمال، پەرلەمانتارێ پارتی ل پەرلەمانێ ئیراقێ بۆ رۆژناما ئەڤرۆ دیار كر، كارێ ئێكێ یێ فڕاكسیۆنا پارتی ل بەغدا، چارەسەركرنا ئاریشەیا مووچەیێ فەرمانبەرێن هەرێما كوردستانێیە و گۆت: “شاندێ حوكمەتا هەرێما كوردستانێ ل گەل حوكمەتا فیدڕال دێ گەهنە رێككەفتنێ و د دەمەكێ نێزیك دا قانوونا بودجەیێ بۆ پەرلەمانی دێ هێتە هنارتن، داكو بهێتە راستڤەكرن، ب تایبەتی هەردو بڕگەیێن گرێدای مووچەیێ فەرمانبەرێن هەرێما كوردستانێ د ناڤا قانوونا بودجەیێ دا”.
شێروان دوبەردانی گۆتژی: “هەموو فڕاكسیۆنێن كوردی ل سەر هەلوێستی خوە رژدن بۆ ڤێ چەندێ د دەمێ راستڤەكرنا قانوونا بودجەیێ دا مووچەیێ فەرمانبەران بهێتە جوداكرن و ئاریشەیا مووچەیێ فەرمانبەران بهێتە چارەسەركرن، چونكی ئەم چو كارێن دی ناكەین و چو پڕۆژەیێن دی ژی مەنینن وەك فڕاكسیۆنا پارتی هەتا بابەتێ مووچەی نەهێتە چارەسەركرن و هەیڤانە مووچەیێ فەرمانبەران بهێتە گەرەنتیكرن”.
