پارتێن رۆژهه‌لاتێ كوردستانێ به‌رسڤا ئیرانێ دده‌ن
ئه‌ڤرۆ:
فه‌رماندارێ هێزێن پاسدارێن ئیرانێ محه‌مه‌د پاكپور بۆ ده‌زگه‌هێن راگه‌هاندنا ئیرانێ دیار كر كو دڤێت وه‌لاتیێن سڤیل یێن هه‌رێما كوردستانێ خوه ژ بنگه‌ه و باره‌گایێن پارتێن كوردی دوور بكه‌ن، چونكو ئه‌و دێ ئێرشی وان بنگه‌هان كه‌ن، ژ به‌ر كو ده‌مه‌كه ل سه‌ر سنورێ ئیرانێ چالاكیێن سه‌ربازی هه‌نه و ئیران دێ ب توندی به‌رسڤا وان ده‌ت.
د ڤێ ده‌ربارێ دا ناڤه‌ندا هه‌ڤكاریا پارتین رۆژهه‌لاتێ كوردستانێ د داخۆیانیه‌كێ دا راگه‌هاند كو ئه‌و جهێ ئیران به‌حسێ وان دكه‌ت كه‌مپێن خه‌لكێ سڤیل یێ رۆژهه‌لاتێ كوردستانێ نه كو ب سالانه ژ به‌ر زۆلم و زۆرداریا رژێما ئیرانێ نه‌چار ماینه و به‌رێ خوه داینه هه‌رێما كوردستانێ، پارتێن رۆژهه‌لاتێ كوردستانێ هه‌رده‌م رێز ل سه‌روه‌ریا ئیراقێ و هه‌رێما كوردستانێ گرتینه، ئیرانێ دڤێت ب ڤان به‌هانان جاره‌كا دی ئێرشی خه‌لكێ سڤیل بكه‌ت، ژ به‌ر هندێ ژی دڤێت جڤاكێ نێڤده‌وله‌تی ل هه‌مبه‌ر گه‌فێن ئیرانێ بێده‌نگ نه‌بیت، چونكو به‌ری نها ژی ئیرانێ ب به‌هانێن وه‌سا بنگه‌هێن پارتێن رۆژهه‌لاتێ كوردستانێ تۆپباران كرینه كو د ئه‌نجام دا گه‌له‌ك وه‌لاتیێن سڤیل بووینه قوربانی و دڤێت ئیران ده‌ستان ژ سیاسه‌تا خوه یا توند ل دژی گه‌لێ كورد به‌رده‌ت، پارتێن رۆژهه‌لاتێ كوردستانێ ژی ل هه‌مبه‌ر گه‌فێن ئیرانێ بێده‌نگ نابن.
