پارتێن سیاسی ل تورکیا خوە بۆ هەلبژارتنان بەرهەڤ دکەن
دوهی کۆمسیۆنا بلندا هەلبژارتنان یا تورکیا ناڤێ وان پارتێن سیاسی یێن دێ پشکداریێ د هەلبژارتنێن باژێرڤانیان دا کەن ئاشکرا کر و چاڤدێرێن سیاسی ژی دیار دکەن ئاکپارتی ب هەموو رەنگەکێ کار دکەت دا هەر دو باژێرڤانیێن ئستەنبوول و ئەنقەرە ژ دەستێ پارتا کۆماری دەربێخێنیت.
دوهی کۆمسیۆنا بلندا هەلبژارتنان یا تورکیا ناڤێ وان پارتێن سیاسی ئاشکرا کر یێن ماف هەی پشکداریێ د هەلبژارتنێن ئادارا ٣١ یا ئەڤسالە دا بکەن و دیار کر ئێدی ب فەرمی قۆناغا هەلبژارتنان دەستپێکریە و پارتێن سیاسی دشێن بەربژارێن خوە بۆ سەرۆکاتیا باژێرڤانیان دیار بکەن.
د ڤێ دەربارێ دا نڤیسەر تان ئۆرال راگەهاند، هەلبژارتنێن ڤێجارێ بۆ ئاکپارتیێ گەلەک د تایبەتن، چونکی د هەلبژارتنێن هەری دووماهیێ یێن باژێرڤانیان دا ئاکپارتیێ چەندین باژێرڤانیێن گرنگ ژ دەست دان ب تایبەتی ژی سەرۆکاتیا باژێرڤانیێن ئستەنبول و ئەنقەرە، نها ئاکپارتی ب هەموو رەنگەکێ خوە بەرهەڤ دکەت دا بشێت د ڤان هەلبژارتنان دا هەر دو باژێرڤانیێن ئەنقەرە و ئستەنبولێ ژ دەستێ پارتا کۆماری دەرخینیت، ژ بەر ڤێ یەکێ ژی نها ئاکپارتی ب هەموو رەنگەکێ کار دکەت دا بشێت دو کەسێن دلسۆز و شارەزا بۆ هەر دو باژێرێن مەزن و گرنگ یێن تورکیا بەربژار بکەت.
ناڤهاتی ئەو یەک ژی دیار کریە، نها هەڤڕکیەکا گەلەک مەزن د ناڤبەرا پارتێن سیاسی دا دەستپێکریە، بەری نها پارتا کۆماری وەسا هزر دکر دێ پارتا دەم ل باژێرێن مەزن یێن تورکیا ب تایبەتی ژی ل ئستەنبولێ و ئەنقەرە پشتەڤانیێ ل بەربژارێن وان کەت، لێ دیارە پارتا دەم ژی وانە ژ هەلبژارتنێن بۆری وەرگرتینە و جەماوەرێن وێ ژی ئێدی قەبوول ناکەت ئەو بێی مەرج پشتەڤانیێ ل بەربژارێن پارتێن دی ب تایبەتی ژی پارتا کۆماری بکەن، ژ بەر ڤێ یەکێ ژی ڤێجارێ بۆ پارتا کۆماری ژی یا ب ساناهی نابیت، هەرچەندە ل ئستەنبولێ کەسەک وەکو ئەکرەم ئیمام ئۆغلۆ دشێت رێژەیەکا مەزن یا دەنگان بدەستڤە بینیت، لێ ئەو یەک رامانا هندێ نادەت دێ یێ سەرکەفتی بیت، چونکی د هەلبژارتنێن هەری دووماهیێ یێ باژێرڤانیان ل ئستەنبولێ دا بێی پشتەڤانیا دەنگدەرێن هەدەپێ، پارتا کۆماری نەدشیا سەرکەڤیت و نها ژی بێی دەنگدەرێن پارتا دەم سەرکەفتنا بەربژارێ پارتا کۆماری دێ گەلەک یا ب زەحمەت بیت.
چاڤدێرێن سیاسی ل تورکیا ژی دیار دکەن، هەلبژارتنێن ٣١ ئادارێ دێ تورکیا بەر ب قۆناغەکا نوو ڤە بەت، چونکی بەری هەر تشتەکێ ل باژێرێن مەزن یێن تورکیا هەڤڕکیەکا گەلەک مەزن د ناڤبەرا پارتا کۆماری و ئاکپارتیێ دا هەیە، ل باژێرێن باکورێ کوردستانێ ژی ڤێجارێ پارتا دەم پتر گرنگیێ ددەتە کوردان و دڤێت ستراتیژیا خوە بگوهۆڕیت و خوە ژ چەپێن تورک دوور بکەت، ئەو یەک ژی دشێت کاریگەریەکا باش ل سەر دەنگدەرێن کورد هەبیت، چونکی بەری نها دەنگدەرێن کورد نەرازیبوونا خوە ل هەمبەر سیاسەتا وی دەمی یا هەدەپێ دیار کربوون و ژ بەر ڤێ یەکێ ژی د هەلبژارتنێن هەری دووماهیێ یێ پەرلەمانێ تورکیا دا رێژەیا دەنگێن هەدەپێ کێم بوون، نها پارتا دەم دڤێت شاشیێن بەری نها دوبارە نەکەت و ژ بەر ڤێ یەکێ ژی دهێتە چاڤەرێکرن هەڤڕکیەکا گەلەک مەزن ل باژێرێن کوردی د ناڤبەرا پارتا دەم و ئاکپارتیێ دا هەبیت.
ئەو یەک د دەمەکێ دایە کو بەری نها سەرکردێن ئاکپارتیێ ژی دیار کربوون ئەو ب هەموو رەنگەکێ خوە بۆ هەلبژارتنێن باژێرڤانیان بەرهەڤ دکەن، دڤێت ڤێجارێ ئاکپارتی بشێت سەرۆکاتیا هەر دو باژێرێن مەزن یێن تورکیا ئانکۆ ئستەنبول و ئەنقەرە ژ دەستێ پارتا کۆماری دەرخینیت، چونکی رەجەب تەیب ئەردۆغانێ سەرۆکێ ئاکپارتیێ دیار کریە دڤێت هەر دو باژێر ڤێجارێ بکەڤنە دەستێ ئاکپارتیێ، چونکی یێ حوکمێ ل ئستەنبولێ بکەت دێ شێت حوکمێ ل هەموو تورکیا ژی کەت، ژ بەر ڤێ یەکێ هەلبژارتنێن ڤێجارێ یێ باژێرڤانیان تورکیا بۆ ئاکپارتیێ گرنگیەکا خوە یا مەزن هەیە، ئاکپارتی نها ب هەموو رەنگەکێ خوە بەرهەڤ دکەت و دێ کەسێن هەژی و دلسۆز بۆ سەرۆکاتیا باژێرڤانیان ل هەموو تورکیا هێنە بەربژار کرن، ب تایبەتی ژی ل ئستەنبول و ئەنقەرە، سەرکەفتنا ئاکپارتیێ دێ تورکیا بەر ب قۆناغەکا نوو ڤە بەت.
