پارتێن سیاسی یێن هەرێمێ و بانگەشەیا هەلبژارتنان
دلشاد یوسف دۆسكی
ئێك ژ بنەما و ستوونێن سیستەمێ دیموكراسیێ بریتیە ژ ئەنجامدانا هەلبژارتنان و دەست ب دەستكرنا دەسهەلاتێ ب ڕەنگەكێ دیموكراسی و ئاشتیانە، بانگەشێن هەلبژارتنان ل هەر وەلاتەكێ وەكی فێستەڤال و كەرنەڤالەكێ شارستانی وەك ڕویێ دیموكراسیێ دهێتە نیشادان. پارتێن سیاسی و بەربژارێن وان بەرنامە و پرۆگرام و نێرینێن خۆ یێن سیاسی بۆ دەنگدەر و لایەنگرێن خۆ ددەنە دیاركرن.
ئیراقا پشتی ژناڤبرنا ڕژێما بەعس، سیستەمێ سیاسی تێدا بوویە فیدراڵی و هەلبژارتن بوونە بنەما بۆ بەردەوامیدان ب وی سیستەمی. هەرێما كوردستانێ وەك پشكەك ژ ئیراقا فیدرال د ماوەیێ بیست ساڵێن بۆرین دا چەندین گەڕێن هەلبژارتنان ل سەر ئاستێ هەرێمێ و هەروەسا ئیراقا فیدراڵ ب خۆڤە دیتینە.
ل هەلبژارتنێن ئیراقێ دا چاوانیا بانگەشا هەلبژارتنان پێدڤیە یا جیاواز بیت دگەل بانگەشین هەلبژارتنێن پەرلەمانێ كوردستانێ. یا فەرە هەمی پارت و ئالییێن كوردستانێ و ئەندام و لایەنگرێن وان ب گیانەكێ نیشتیمانی و كوردپەروەرانە بانگەشێ بڕێڤە ببەن، كارەكێ وەسا ئەنجام نەدەن كو بانگەشێ بۆ شكاندنا ئێكودو بكاربینن، سەرباری وێ چەندێ كو ئەگەر ململانێ ژی د ناڤبەرا واندا هەبیت، لێ ژبیر نەكەن كو ئەڤ هەلبژارتنە بۆ هنارتنا نوونەرێن كوردانە بۆ ئەنجوومەنێ نوونەرین ئیراقێ.
دەمێ مرۆڤ تەماشە دكەت كو پارت و لایەنێن سیاسی یێن هەرێمێ سەرباری وێ چەندێ كو نەشیان ب ئێك لیست یان د چارچووڤەیێ هەڤپەیمانییەكێ دا پشكداری هەلبژارتنان بكەن، لێ دشێن و دێ كارەكێ گەلەك یێ گونجایی بیت پرۆسا بانگەشا خۆ وەسا بڕێڤە ببەن كو ببنە ئەگەرێ زێدەكرنا دەنگ و كورسیێن كوردان، ب تایبەت ل باژارێن مووسل و كەركووك و دیالە و سەلاحەدین، چونكی ئەو مەترسیا ل وان جهان ل سەر كوردان و سەنگا وان ل باژێرێن سەر ب كارگێڕیا حوكمەتا هەرێما كوردستانێ هەی نینن، ئانكو ل بازنەیێن هەلبژارتنێن هەرێمێ ڕكابەری ب ڕەنگەكێ ناڤخۆییە د ناڤبەرا هێز و پارتێن سیاسی یێن كوردی، لێ وان پارێزگەهێن مە ئاماژە پێدای یا فەرە ب مۆڕالەكا بلندتر و ب گیانەكێ كوردپەروەرانەتر ئەڤ پرۆسە بهێتە بڕێڤەبرن و بۆ یار و نەیارێن كوردان بهێتە سەلماندن كو هندەك ژ وان باژێڕ و باژێرك و گوندێن دەردۆرێن وان ب بەڵگەیا دەنگێ زۆرینە یێ كوردان ناسنامەیا وان كوردی و كوردستانیە.
یا فەرە ل سەر هەمی پارتێن سیاسی و بەربژارێن وان ڕوویێ زمان و گازندێن وان ژ هەڤدو نەبیت و وەسا ل سەر میزاجێ خەلكی شۆل نەكەن كو ئەگەر دەنگێن ڤی لایەنێ د بەرژەوەندیا لایەنێ دی دا كێم ببن دێ باش بیت ژبۆی هندێ ل پەرلەمانێ حوكمەتا فیدرالی دەستكەفتێن زێدەتر بۆ كوردان بدەستڤە بهێن، بەلكو یا درست ئەوە وێنێ مەزنتر یێ گۆرەپانا سیاسی یا ئیراقێ بێخنە بەرچاڤێن خۆ و دەنگدەرێن خۆ و ژبیر نەكەن كۆ كێمبوونا ئاستێ پشكداریكرن و دەنگێن كوردان ل ڤێ هەلبژارتنێ ئەگەر جارەكی د بەرژەوەندیا لایەنەكێ ناڤخۆیی یێ هەرێمێ دابیت، دو جاران و پتر یا د بەرژەوەندیا وان لایەن و هێزێن ئیراقیدا ئەوێن ل دەلیڤەكێ دگەڕن هەمی دەسهەلاتا ژ هەرێم و خەلكێ وێ وەرگرن و جارەكا دی سیستەمێ سیاسی یێ ئیراقێ بەرەڤ ناڤەندگەرایێ ببەنەڤە و كورد تێدا ببنە سۆخرەكێش و خزمەتكارێن دەسهەلاتدارێن دەولەتەكا ناڤەندی.
هیڤیدارین ژ هەمی هێز و لایەنێن كوردی كارەكێ وەسا بكەن بانگەشێ بكەنە ڤیستەڤاڵەكا خشكۆك بۆ هەرێمێ و ئەزموونا وێ و زێدەكرنا نوونەرێن كورد.
