پاركێن بهێنڤه‌دانێ ل دێره‌لۆك پێدڤی ب نووژه‌نكرنێ نه
ئامێدیێ، مه‌حمود نهێلی
پشتی چه‌ندین سالان هاتیه به‌ردان سێ باخچه‌یێن یاریێن زارۆیان وپاركێن بهێن ڤه‌دانێ ل سه‌نته‌رێ ناحیا دێره‌لۆكێ ژكار كه‌فتینه و پێدڤی ب نووژه‌نكرنێ نه و هاولاتی ژی ژ به‌ر نه‌بوونا چ جهێن بهێنڤه‌دانێ دلگرانیا خوه نیشان دده‌ن.
نازی عه‌لی، ئاكنجیێ سه‌نته‌رێ ناحیا دێره‌لۆك بۆ ئه‌ڤرۆ دیار كر، هه‌بوونا پاركان و باخچه‌یێن بهێنڤه‌دانێ ئێك ژ كارێن فه‌رن و پێدڤیه ل دێره‌لۆكێ هه‌بانه، لێ هه‌تا نوكه ئه‌ڤ یه‌كه ل دێره‌لۆكێ نینه و گۆت: (مه گه‌له‌ك جاران یێ داخاز ژی كری باخچه‌یه‌ك ل دێره‌لۆكی بهێته چێكرن دا كو زارۆیێن مه یاریان تێدا بكه‌ن و خوه دووربكه‌ن ژ كار و یاریێن دیتر كو مه‌ترسی ل سه‌ر هه‌بیت).
ناڤهاتی خویاكر، گه‌له‌ك جاران نه‌بوونا چ پاركان ل دێره‌لۆكێ بوویه ئه‌گه‌رێ مه‌ترسیێ ل سه‌ر زارۆیان، ژ به‌ر كو زارۆ بارا پترێ یاریان ل سه‌ر رووباری و ل سه‌ر جاده‌یان یاریان دكه‌ن و چێدبیت گه‌له‌ك جاران ژیانا وان یێ كه‌فتیه مه‌ترسیێ دا.
ئێك ژ وه‌لاتیێن دیتر ب ناڤێ سه‌فه‌ر گۆت: هه‌روه‌كو ئه‌م دزانین سێ باخچه و پاركێن یاریان ل دێره‌لوكێ هه‌نه، لێ چ ژ وانا ب كێری هندێ ناهێت كو زارۆ یاریان تێدا بكه‌ن یان ژی پێنج خۆله‌كا كه‌سه‌كی تێدا بهێنا خوه ڤه ده‌ت ، ناڤهاتی هیڤی ژی خوه‌ستن كو ئه‌ڤ سێ پاركه ل دێره‌لۆكێ بهێنه چێكرن و بهێنه نووژنكرن دا كو خه‌لكی ده‌ڤه‌رێ ژی بشێن مفاژی ژێ وه‌رگرن.
ئه‌ندازیار عه‌بدولمه‌ناف ره‌شید سه‌رۆكێ باژێرڤانیا دێره‌لۆك بۆ رۆژناما ئه‌ڤرۆ دیاركر، راسته نوكه سێ پاركێن ژ كاركه‌فتی ل دێره‌لۆكێ هه‌نه و هه‌رسێ ژی پێدڤی ب نووژه‌نكرنێ و گۆت: (به‌ری چه‌ند سالان ئێك ژ وان پاركان هاتبوو نووژه‌نكرن، لێ وه‌ك پێدڤی نه‌هاته سه‌خبێكرن ژ به‌ر وێ یه‌كێ ژی یاریێن وێ ژ لایێ زارۆیان ڤه هاتنه شكاندن و پارك ب ئێك جاری هاته به‌ردان).
ده‌رباره‌ی باخچه‌یێ باژێرڤانیێ ژی ئه‌ڤێ دناڤبه‌را رووبارێ زێ و سپنه دا ژی ناڤاتی ئاشكراكر، كو به‌ری نوكه و ل ده‌مێ به‌رفره‌هیێ خه‌لكی ئاواره‌ی و خه‌لكێ ره‌ڤیایی ژ به‌ر شه‌رێ په‌كه‌كی لێ ئاكنجی ببوون و پشتی ئاریشه‌یا ڤالا كرنێ هاتیه چاره‌سه‌كرن، ئه‌ڤ قه‌یرانا ئابووری ب سه‌ر هه‌رێمێ دا هات و نوكه هند خێزان تێدا ماینه و ئاریشا وان یا قه‌ره‌بووكرنێ ب داوی نه‌هاتیه و ته‌كه‌ز كر وان د ئه‌ڤ ساله دا ژی پرۆژه‌یێن زور گرنگ ئه‌نجام داینه كو ژیانا خه‌لكێ ده‌ڤه‌رێ پێڤه گرێداینه و نوكه ژی هنده‌ك ل ژێر ب جهئینانێ دانه).
ناڤهاتی دیار ژی كر، ب پرۆژه‌یێن قوناغا داهاتی كو چێدبیت هه‌ر د ئه‌ڤ ساله دا بهێنه بجهئینان چێكرنا وان پاركی ژی یێن تێدا و هه‌ر ده‌مه‌كی رازیبوون ل سه‌ر وان پرۆژه‌یان هاته كرن و كارێ وان ده‌سپێكر دێ ئه‌ڤ پاركه ژی هێته نووژه‌نكرن و دێ شێن مفایه‌كی باش ژێ هێته وه‌رگرتن.
