پاركەكا نشتمانی یا گەشتیاری دێ ل زاخۆ هێتە دانان
رێڤەبەرێ گشتی یێ گەشتوگوزاری ل ئێدارا سەربەخۆیا زاخۆ دیار كر، گەلەك پێشڤەچوونێن باش د كەرتێ گەشتوگوزارێ دا ل زاخۆ پەیدا بووینە و نوكە كار دهێتە كرن زاخۆ ببیتە باژێرەكێ گەشتیارێ، دێ پاركەكا نشتیمانی یا گەشتیاری هێتە دانان.
چیا ئەمین، رێڤەبەرێ گشتی یێ گەشتوگوزاری ل ئێدارا سەربەخۆیا زاخۆ ئاشكەرا كر: «پشتی زاخۆ بوویە ئیدارا سەربەخۆ، گەلەك رێڤەبەرێ بووینە رێڤەبەریێن گشتی و رەوشا زاخۆ گەلەك هاتیە گوهارتن، نوكە رەوشا گەشتوگوزارێ گەلەك باش بوویە و دەڤەرا زاخۆ یا گونجایە ببیتە باژێرەكێ گەشتوگوزاری و هەبوونا ژێدەركێ وەكو رووبارێ خابۆری ل زاخۆ ئێكە ژ خالێن بهێز زاخۆ ببیتە باژێرەكێ گەشتیاری و پلان هاتییە دانان زاخۆ ببیتە باژێرەكێ گەشتیارێ «.
ئاماژە دا وێ چەندێ ژی: «نڤیسارێن فەرمی ژلایێ ئێدارا سەربەخۆیا زاخۆ ڤە هاتینە بلندكرن بۆ وەزارەتا شارەوانی ل حوكمەتا هەرێما كوردستانێ، دوو رێڤەبەریێن گەشتوگوزاری ل زاخۆ بهێنە ڤەكرن، دێ رێڤەبەرییا گەشتوگوزارا باتیفا و رێڤەبەرییا گەشتوگوزارا رزگاری هێنە ڤەكرن، ئەڤە دگرنگن ژبەر كوو باتیفا ب خۆ دەڤەرەكا گەشتیارییە و ل سنوورێ ناحیا رزگاری ژی كۆمەلگەها ئیبراهیم خەلیل و دەرگەهێ پێشابیری و ئیزدی و مەسیحی گەلەك ل وێ دەڤەرێ د ئاكنجیی نەـ لەورا مە گرنگی پێ دایە و رێڤەبەریا گەشتوگوزارێ ل ناحیا رزگار سەر ئیدارا سەربەخۆیا زاخۆ ڤەكەن».
چیا ئەمین گۆت ژی: «ب هزارەها دەلیڤێن كاری بۆ گەنجان ب رێیا كەرتی گەشتوگوزارێ پەیدا بووینە و هژمارەكا زۆر پرۆژان هاتینە بجەئینان و چەندین هاڤینگەهێن گەشتیاری هاتینە نووژەنكرن و جادەیێن جهێن گەشتیاری ژی دهێنە سەخبیریكرن».
تەكەست كر «ئێك ژ پرۆژەیێن گەلەك گرنگ، پرۆژەیێ كورنیشی زاخۆیە، ئەڤە دێ دەمەكێ نێزیكدا هێتە ڤەكرن و پرۆژەیێ گەلیێ زاخۆ ژی بەرەڤ قوناغێن دووماهیێ یە و پاركەكا نیشتمانیی یا گەشتیاری ل زاخۆ دهێتە دانان و پرۆژەیێ تەمامكرنا خابۆری زاخۆ ژی هاتییە دانان و چەندێن پرۆژە د وارێ گەشتوگوزاریدا ل زاخۆ دهێنە بجهئینان و چار ئۆتێلێن پێنچ ستێر ل زاخۆ دهێنە ڤەكرن».
