پارچێن شوونواری ل خورسەبات و گرێ بایبوختێ ھاتینە ژناڤبرن
ئەڤرۆ نیوز، بارزان مزووری:
مێژوویا جھێن شوونواری یێن (خورسەبات) و (گرێ بایبوختێ) دزڤریت بۆ بەری ٣٠٠ ھزار سالان ل سەر دەمێ ئیمپراتوریەتا ئاشووری، بەری روودانێن ١٦ ئوکتوبەرێ یێن سالا ٢٠١٧ێ ژ لایێ ھێزێن پێشمەرگەی ڤە دھاتنە پاراستن و سەخبێرکرن و گەلەک ژ پارچێن شوونواری ژی ژ لایێ پێشمەرگەی ڤە ھاتبوونە دیتن و ھەلگرتن، بەلێ پشتی ھاتنا حەشدا شەعبی بۆ وان دەڤەران ئەو شوونوار مانە بێ خودان و ئەو پارچێن شوونواری یێن گرنگ ژ لایێ دەستھەلاتداریا وێ دەڤەرێ ڤە ھاتنە ناڤبرن.
محەمەد عارف، شوونوارناس ل قەزا شێخان بۆ ئەڤرۆ نیوز دیار کر کو بەری دو سالان دەمێ رزگارکرنا دەڤەرا باشیکێ ژ دەستێن تیرۆرستێن داعش گەلەک پارچێن گرنگ یێن شوونواری ژ لایێ ھێزێن پێشمەرگەی ڤە ل جھێ شوونواری یێ خورسەبات و گرێ بایبوختێ ھاتبوونە دیتن و ژ لایێ پێشمەرگەی ڤە دھاتنە پاراستن، لێ پشتی روودانێن ١٦ ئوکتوبەرێ یێن سالا ٢٠١٧ێ حەشدا شەعبی ھاتیە وێ دەڤەرێ ئەو پارچێن شوونواری یێن گرنگ ژ لایێ دەستھەلاتداریا وێ دەڤەرێ ڤە ھاتنە ناڤبرن و گۆت: “رێڤەبەریا شوونواران ل مووسل ل سەر ڤێ چەندێ یا ئاگەھدارە لێ ھەتا نوکە چو زێرەڤان نەداناینە وان جھێن شوونواری”.
ناڤھاتی ئاماژە دا وێ چەندێ کو لەھیێن بارانان گەلەک پارچێن شوونواری ل وان جھان دەرخستبوون، لێ ھەموو ھاتنە دزین و گۆت: “پرۆژەک ھەبوو رێکخراوەک مۆزەخانەکێ ل وی جھی بدانیت، لێ رێ ژ لایێ دەستھەلاداریا وێ دەڤەرێ ڤە پێ نەھاتەدان”.
