پارچەیێن ئەردی یێن نـوو ل زاخـۆ هاتینە بەلاڤكرن دێ هێنە تاپۆكرن
زاخۆ، دلۆڤان هالۆ:
نەوزاد حاجی، بەرپرسێ بەلاڤكرنا پارچەیێن ئەردی ل زاخۆ بۆ ڕۆژناما ئەڤرۆ دیار كر كو پشتی ب بڕیارا مەسرور بارزانی، سەرۆكێ حكومەتا هەرێما كوردستانێ چار هزار و 747 پارچەیێن ئەردی ب شێوەیەكێ زەلال و سەركەفتی ل سەر فەرمانبەرێن زاخۆ هاتینە بەلاڤكرن، د نوكە دا بەرهەڤیێن تاپۆكرنا وان دهێنە كرن.
بەرپڕسێ بەلاڤكرنا پارچەیێن ئەردی ل زاخۆ ئاماژە ب وێ چەندێ ژی كر كو هەر ژ بۆ ڤێ مەرەمێ وان دەست ب وەرگرتنا ناسنامە و بەلگەنامەیێن وان كەسان كریە یێن كو وان پارچەیێن ئەردی ل سەر وان بەلاڤكرین و گۆت: «ئەم ئامادەكاریێن نڤیسارێن وان دكەین، داكو بۆ وان بنهێرینە ڕێڤەبەریا تۆماركرنا خانووبەران ل زاخۆ، داكو تاپۆیێن پارچە ئەردێن خوە وەربگرن».
ناڤهاتی گۆتژی:»نڤیسارێن ڕازیبوونا وان پارچەیێن ئەردی یێن هاتین و ئەم دێ هەمیان كۆپی كەین و پشتی هینگێ ئاماژە دەینە وان نڤیساران و ژ نوو دێ هێنە هنارتن بۆ ڕێڤەبەریا تۆماركرنا خانووبەران».
بەرپڕسێ بەلاڤكرنا پارچەیێن ئەردی ل زاخۆ زێدەتر گۆت: «ئەم بزاڤان دكەین، هەتا پشتی دەوامێ ژی كار بكەین، داكو ئەم بەلگەنامەیێن وان وەربگرین و ب زووترین دەم تاپۆیێن پارچەیێن خوە یێن ئەردی وەربگرن».
