پارێزه‌ری چه‌ند شیان هه‌نه وژدانا خوه بپارێزت؟
قانوون ئه‌ڤرۆ ل كوردستانێ پێنگاڤ پێنگاڤ رێیا خوه یا دبینیت ل ناڤ جڤاك و ملله‌تێ كورد و یا دیاره ژ ره‌فتارێن وه‌لاتیان كو قانوون یا بوویه جهێ چاره‌سه‌ریا ئاریشه و كێشه‌یێن جڤاكی و بازرگانی و چه‌ندین كێشه‌یێن جۆره و جۆر و یا دیاره كو باوه‌ریا ملله‌تی ب قانوون پیچ پیچه دهێت و ئه‌م هه‌می دزانین كو رۆلی سه‌ره‌كی د جێبه‌جێكرنا قانوونێ دا یێ پارێزه‌ری یه چونكو ل دووڤ دادوه‌ری بۆ شاره‌زایێ د وارێ قانوونی دا پارێزه‌ر دهێت كو كه‌سانه‌ك تایبه‌تمه‌ند د وارێ قانوون و جێبه‌جێكرنا وێ دا ل دادگه‌هێ و ب راستی ئه‌ڤ ئه‌ركه دبیته وه‌كو ئیمانه‌ته‌كێ گه‌له‌ك گرنگ ل سه‌ر ملێن پارێزه‌ری.
ئه‌ڤرۆ ل دادگه‌هێن مه یێن كوردستانێ ب شێوه‌كێ گشتی و ل پارێزگه‌ها دهۆكێ ب شێوه‌كێ تایبه‌ت ئه‌م ژماره‌كا زۆرا پارێزه‌ران دبینێن كو كارێ پارێزه‌ریێ دكن و كێشێن وه‌لاتیان دبنه به‌ر ده‌ستێ دادوه‌ری و ل دووڤ زانین و شاره‌زایا خوه شیان هه‌نه زانیاریان كۆم بكن و بكه‌نه ده‌لیل بۆ به‌رژه‌وه‌ندیا موه‌كلێ خوه, ئه‌ڤه ژی مافه‌ك شرعیه هه‌كه پارێزه‌ر پشتراست بیت ژ بێگونه‌هیا موه‌كلێ خوه، به‌لێ پرسیار ئه‌ڤه‌یه ئه‌رێ هه‌كه موه‌كلێ پارێزه‌ری گونه‌هباربیت و پاره‌كێ زۆر دانیته به‌ر ده‌ستێ پارێزه‌ری دێ ئه‌ڤ پارێزه‌ره به‌رێ خوه ده‌ته پاره‌ی یان دێ وژدانا خوه كه‌ته دادوه‌ر و پشتا راستێ گرت؟ ئه‌ڤ پرسیارا هه‌نێ ئه‌ز دكه‌م ژ هه‌می پارێزه‌رێن مه یێن هێژا ل كوردستانێ, نه‌خاسمه پارێزه‌رێن ژن یێن كو بابه‌تێن كێشه‌یێن جڤاكی ب ده‌ستخوه‌ڤه دگرن و دشیان دانه كو بابه‌تێن ئاریشێن جڤاكی به‌روڤاژی راستیێ جێبه‌جێبكن دژی زه‌لامی و نه‌خاسمه ئه‌ڤرۆ قانوونێ بارێ كه‌ساتی یێ راستڤه‌كری ل كوردستانی چه‌ندین قانوون گوهۆرینه بۆ به‌رژه‌وه‌ندیا ژنان، چونكو یا ئه‌م هه‌می دزانین كو كێشێن جڤاكی ل دادگه‌هێ ل پلا ئێكێ ب هیڤیا شاهدانه و هه‌بوونا شاهدان دبیته فاكته‌ره‌كێ سه‌ره‌كی بۆ بریارا دادوه‌ری، ئه‌م هه‌می دزانین كو بابه‌تێ شه‌هده‌كیان نه دروست بوو هنده‌ك كه‌سانان كاره‌كی ساناهیه و د شیان دانه هنده‌ك كه‌س سویندێن دره‌و بخۆن پێخه‌مه‌ت گۆژمه‌كی پاره‌ی, ئه‌ڤجا رۆلێ پارێزه‌ری یێ زه‌لام یان ژی پارێزه‌را ژن ئه‌وه كو شاره‌زایا خوه و شیانێن خوه بكاربینیت ژ بۆ پاراستنا راستیێ و مافێ كه‌سی نه‌هێته به‌رزه‌كرن و ب دیتنا من ئه‌و پارێزه‌رێ كارێ خوه ب دروستی بكه‌ت و هه‌رده‌م ل پشتا راستیێ بیت و مافێ كه‌سێ به‌رزه نه‌كت دكارێ خوه دا, ئه‌و پارێزه‌ره باشترین وه‌لاتیه بشێت كوردستانێ ئاڤاكه‌ت و هه‌تا ب دیتنا شه‌رعی ژی خێرا وی به‌رامبه‌ری گۆژمه‌كێ مه‌زن ژ خێرانه, چونكو ب رێیا وی
قانوون و عه‌داله‌تا جڤاكی دێ هێته جێبه‌جێكرن و ل كوردستانێ پشتی سه‌رۆك مه‌سعود بارزانی گۆتی: نا بیت كه‌س ل سه‌ر قانوونێ را بیت. پارێزه‌ر باشترین كه‌سه كو دشیان دانه ڤێ گۆتنێ جێبه‌جێ بكه‌ت و هه‌ر پارێزه‌ره‌ك وژدانا خوه بفرۆشیت و زانینا خوه بكاربینیت ژ بۆ به‌رژه‌وه‌ندیا خوه یا تایبه‌ت بێ كو راستیێ بپارێزت دڤێت بهێت سزادان و هه‌ڤالێن وی یێن پارێزه‌ر سكالا ل سه‌ر تۆمار بكه‌ن داكو سه‌ندیكا پارێزه‌ران كاری وی براوه‌ستینت و دا كو ناڤێ پارێزه‌ری بمینت پاك و پاقژ و داكو یاسا ل كوردستانێ ببیته نموونه‌كا باش ل هه‌می عیراقێ بۆ جێبه‌جێكرنا عه‌داله‌تێ.
