پارێزگاری پشتەڤانیا كارگێڕیا پارێزگەهێ بۆ هاریكاریكرنا رۆژنامەڤانان دیاركر
د. عەلی تەتەر، پارێزگارێ دهۆكێ دوهی 6/11/2024 هەڤدیتنەك ل گەل خانم ڤیان عەباس، سەرۆكا لقێ دهۆك یا سەندیكا رۆژنامەنڤیسێن كوردستانێ و هەژمارەكا رۆژنامەڤانێن پارێزگەها دهۆكێ ژ دەزگەهێن جودا جودا كر.
د هەڤدیتنێ دا سەرۆكا لقێ دهۆك یا سەندیكا رۆژنامەنڤیسێن كوردستانێ چەندین رۆهنكرن دانە سەر پیشەیا رۆژنامەڤانیێ و ئاستەنگ و ئاریشەیێن دكەڤنە هەمبەر كارێ رۆژنامەڤانان، وەكو: پەیداكرنا داتا و پێزانیان بۆ راپۆرتێن رۆژنامەڤانی و خواست كو پارێزگارێ دهۆكێ پشتەڤانیێ ل كارێ رۆژانە یێ رۆژنامەڤانان بكەت.
ژ لایێ خۆڤە پارێزگارێ دهۆكێ رۆلێ كاریگەر یێ میدیاكار و رۆژنامەڤانیێ باش بەرچاڤ و دیاركر هەمبەر رۆمالكرنا چالاكیێن گشتی و جوراوجور و دوپاتی ل ئازادیا رۆژنامەڤانی و رۆژنامەگەریێ كر و خواست هەموو رۆژنامەڤان و میدیاكار ب هەستەكا نیشتمانی و نەتەوەیی و ب رەنگەكێ پیشەیی و ل دووڤ یاسا و پرەنسیپێن رۆژنامەگەری كار و خزمەتێ پێشكێش بكەن و پشتەڤانیا كارگێریا پارێزگەهێ بۆ هەر هاریكاریەكێ دیار كر.
پاشی چەندین پرسیار و پێشنیار ژ لایێ رۆژنامەڤانێن بەرهەڤبووی هاتنە ئاراستەكرن و بەرسڤ ل سەر هاتەدان.
