پارێزگارێ دهۆكێ بۆ كچێن قارەمان: پشت راستبن دێ بەردەوام پشتەڤانییا هەوە كەم
د مەراسیمەكێ تایبەت یێ رێزلێئینانێ دا د. عەلی تەتەر پارێزگارێ دهۆكێ پێشوازییا شاندنێ تیما فوتسالا یانەیا ئافرەتێن دهۆكێ كر ئەوێن شیایین ناسناڤێ قارەمانییا خولا كوردستانێ بۆ وەرزێ 2023- 2024 ب دستڤەئینایی پشتی د یارییا دووماهیێ دا شیایی سەركەفتنێ ل سەر تیما كچێن یانەیا زاخۆ بینت ب شەش گۆلان بەرانبەر گۆلەكێ د یارییا واندا ئەوا ل باژێرێ زاخۆ هاتییە كرن.
د روونشتنا خوە دا دگەل شاندێ یانەیا ناڤهاتی پارێزگارێ دهۆكێ دەستخوەشییا ل كارگێری و تیما كچێن دهۆكێ كرن كو شیایین بۆ جارا دویێ د دیرۆكا خوە دا ناسناڤێ كوردستانێ ب دەستڤە بینن و دووڤدا خەلاتكرن ژبەر ناسناڤێ وان و گۆت: بۆ وەرزشا كچان ل پارێزگەهێ و یانەیا ئافرەتێن دهۆكێ هەردەم پشتەڤانین و پشت راستبن دێ بەردەوامبین و مەرەما مە ژی پێشئێخستنا ئاستێ وەرزشا كچانە و گرنگی دان ب رۆلێ كچان د هەمی واران دا ژ وانا وەرزش، ل سەر ئاستێ كوردستانێ و ئیراقێ هەردەم وەرزشڤانێن ئافرەت یێن پارێزگەها دهۆكێ ناسناڤ و رێزێن پێشیێ ب دەستڤە ئیناینە، لەوما ئەم بەردەوام دێ پشتەڤانییا كچێن پارێزگەها خوە كەین.
ژلایێ خوەڤە سەردار سالح سەرۆكێ یانەیا ئافرەتێن دهۆكێ سۆپاسییا پارێزگاری كر و گۆت: هەر ژ دەستپێكا كاربوونا مە هەوە ئەم گەشبین كریینە ژبۆ پشتەڤانیێ و مە ژی سۆزدا بەرانبەر ئەوێ پشتەڤانیێ ئەم ناسناڤێ كوردستانێ بوو هەوە بكەینە دیاری، ئەڤرۆ پێخوەشحالین ئەو ناسناڤ ل بەر دەستێ هەوەیە و بوو هەوە دیاری یە، بۆ قارەمانیێن داهاتی ژی دگەل پشتەڤانییا هەوە ئەم رژدین بەردەوامیێ بدەینە دەستكەفتان و پێشئێخستنا ئاستێ یاریزانێن كچ یێن یانەیێ.
