پارێزگارێ دهۆكێ خوەشحالیا خوە ب مێڤانداریكرنا كۆپا فۆتسالا ئیراقێ یا كچان دیار كر
دوهی ل كۆچكا پارێزگەهێ د. عەلی تەتەر پارێزگارێ دهۆكێ پێشوازیا ئەنداما ئێكەتیا تەپا پێی یا ئیراقێ و سەرۆكا لژنەیا فوتسالا كچان د. رەشا تالب و شاندێ دگەل دا كر، ب مەرەما دووماهی زانیاری ل سەر مێڤانداریكرنا پارێزگەها دهۆك بۆ قارەمانیا كۆپا ئیراقێ هاتە بەحسكرن ئەوا بڕیارە هەڤڕكیێن وێ ئەڤرۆ ل هولا كولیژەیا پەروەردەیا چەستەیی و زانستێن وەرزشی ل زانكۆیا دهۆك بهێتە كرن.
هەر د ڤێ هەڤدیتنێ دا پارێزگاری خوەشحالیا خوە ب دەستپێكرنا كۆپا ئیراقێ یا فۆتسالا كچان ل پارێزگەهێ دیار كر و هیڤییا سەركەفتنێ بۆ قارەمانیا ناڤهاتی خواست، هەردیسان گەنگەشە ب گشتی ل سەر رەوشا وەرزشا كچان ل ئیراقێ و تایبەتی ل كوردستانێ هاتە كرن. ژلایێ خوەڤە ئەنداما ئێكەتیا تەپا پێی یا ئیراقێ سۆپاسیا پارێزگارێ دهۆكێ كر ژبۆ پشتەڤانی و ئاسانكارییان د هەموو پێرابوونێن كارگێری دا پێخەمەت سەركەفتنا هەڤڕكیێن قارەمانیێ، د ڤێ كۆمبوونێ دا هەر ئێك ژعەمید فەخری رێڤەبەرێ پۆلیسێن پارێزگەها دهۆكێ و عەمید ئیبراهیم عەگید رێڤەبەرێ هاتنۆچوونا پارێزگەها دهۆكێ و كتور ئەفراسیاب مۆسا رێڤەبەرێ گشتی یێ ساخلەمیا پارێزگەها دهۆكێ ئامادەبوون.
بۆ زانین كۆپا ئیراقێ دێ هەتا 27ێ ڤێ مەهێ بەردەوام بیت ئەوا ب پشكداریا دەهـ یانەیان هێتە ئەنجامدان، ل سەر دو كۆمان هێنە بەلاڤكرن كو رۆژانە چار یاری بەردەوامبن هەتا قۆناغا كۆمان ب دووماهی دهێت، دو تیم ژ هەر كۆمەكێ دێ دەربازبیتە چارگۆشەیا زێرین، تیمێن پشكدار ئەو ژی، ئافرەتێن هەولێر، جەویە، زەورا، تلسقۆف، قەرەقۆش، سیناعات كارەبا، ئال بدێر، رافیدەین، شەهربان و بیلادی.
