پارێزگارێ دهۆكێ: سكرێ خنس و دەروبەرێن وی دێ بیتە جهەكێ گەشتیاری
د. عەلی تەتەر، پارێزگارێ دهۆكێ دوهی 1/8/2023 سەرا دەڤەرداریا شێخان دا و ژ لایێ سەردار یەحیا دەڤەردارێ شێخان و چەند رێڤەبەرێن فەرمانگەهان ڤە پێشوازێ لێ هاتە كرن و پارێزگارێ دهۆكێ گۆت: پلانەك هەیە، كو سكرێ خنس و دەروبەرێن وی ببیتە جهەكێ گەشتیاری.
د هەڤدیتنەكێ دا ب بەرهەڤبوونا كەریم سلێمان، بریكارێ وەزارەتا چاندنێ بەحسێ كار و پڕۆژەیێن حوكمەتا هەرێما كوردستانێ ئەوێن ل سنوورێ دەڤەرداریا شێخان دهێنە ئەنجامدان و پێدڤیا خەلكێ دەڤەرێ ب پتر پڕۆژەیان هاتە كرن.
هەروەسا بەحسێ گرنگیا سكرێ خنس بۆ كەرتێ چاندنێ و گەشتیاری هاتە كرن و پارێزگارێ دهۆكێ گۆت: «پلانەك هەیە، كو سكرێ خنس و دەروبەرێن وی وەكو جهەكێ شوونواری و ببیتە جهەكێ گەشتیاری یێ جوان و رێكوپێك ل دەڤەرێ و سەرنجا گەشتیاران رابكێشیت و دەلیڤێن كاری ژی بۆ خەلكێ دەڤەرێ بهێنە دابینكرن».
دیسا هەر دوهی و ب مەرەما گرنگیدان ب زێدەكرنا سامانێ ماسیان و ب بەرهەڤبوونا د. عەلی تەتەر، پارێزگارێ دهۆكێ و كەریم سلێمان، بریكارێ وەزارەتا چاندنێ و سەردار یەحیا، دەڤەردارێ شێخان و چەند رێڤەبەرێن پەیوەندیدار 75 هزار تێشكێن ماسیان بەردانە د ناڤ سكرێ خنس دا و دەستخوشی ل وەزارەتا چاندنێ كر ل دۆر ئەو گرنگیا ب سامانێ ماسیان ددەت.
پارێزگارێ دهۆكێ گۆت: «نوكە كار ل سەر دروستكرنا دو بەنداڤێن دی دهێتە كرن و هەردەما ب دوماهی هاتن دێ تێشكێن ماسیان بۆ هێنە دابینكرن».
دیسا هەر دوهی د. عەلی تەتەر، پارێزگارێ دهۆكێ و ئەندامێ كۆمیتا ناڤین یا پارتی دیموكراتی كوردستان سەرا بارەگایێ لقێ 20 یێ پارتی ل شێخان دا و ژ لایێ سالح حەیدەر، بەرپرسێ لقێ 20 و ئەندامێن لقێ پێشوازی لێ هاتە كرن و د هەڤدیتنەكێ دا بەحسێ كار و پڕۆژەیێن حوكمەتا هەرێما كوردستانێ ئەوێن ل سنوورێ دەڤەرداریا شێخان دهێنە ئەنجامدان هاتە كرن.
