پارێزگارێ دهۆكێ شڤان لهزگین دادڤانێ نێڤدهولهتی خهلاتكر
ئهڤرۆ،
دوهی ل كوچكا پارێزگهها دهۆكێ د پێشوازیهكا جودا دا د. عهلی تهتهر پارێزگارێ دهۆكێ دادڤانێ نێڤدهولهتی و كوڕێ باژێرێ سێمێلێ شڤان لهزگین بۆ یاریا تایكۆاندویێ خهلاتكر، پشتی ب سهرفهرازی شیایی قارهمانیێن نێڤدهولهتی ل وهلاتێ كوریا باشۆر و قارهمانیا ڤهكری یا جیهانی ل وهلاتێ ئیرانێ بڕێڤهببهت.
لدور ڤێ خهلاتكرنێ د داخویانیهكێ دا شڤان لهزگین بۆ رۆژناما ئهڤرۆ گۆت: سۆپاسیا پارێزگارێ دهۆكێ د. عهلی تهتهر دكهم ئهوێ ب جوانی و كهیفخووشی پێشوازیا من كری و ئهز خهلاتكریم دهرئهنجامێ ماندیبوونا من و ئاستێ من وهكو تاكه دادڤانێ نێڤدهولهتی و باوهرپێكری سهر ئاستێ ئیراقێ و كوردستانێ پشكداری دو قارهمانیێن نێڤدهولهتی بوویم ل ههردو وهلاتێن ئیرانێ و كوریا باشۆر كو ئهڤ پێشوازییه مهزنترین خهلاته بوو كو ددهمهكی دا بهرپرسێن وهرزشی ل پارێزگههێ و تایبهت بڤێ یاریێ ڤه پێشوازیا من نهكری لێ ب سنگهكێ بهرفرهه و گرنژین پارێزگارێ دهۆكێ پێشوازیا من كری ئهڤچهنده رێزگرتنه بۆ كارێ من و زهحمهتا من بری وهكو تاكه دادڤانێ كورد و ههرێما كوردستانێ و شانازیێ پێ دبهم.
ناڤهاتی ئهوچهنده ژی دیاركر كو پارێزگارێ دهۆكێ كهیفخووشا خوه دیاركر ب ههبوونا دادڤانێن ب قهبارێن نێڤدهولهتی و باوهرنامێن باوهرپێكری ل ئێكهتیا جیهانی و هیڤی خواست ههر ئێك ژلایێ خوهڤه ژبۆ پێشخستنا وهرزشێ و پشتهڤانیا گهنجا كاربكهن و بهرههڤییا خوه دیاركر ل دووڤ شیانا ههردهم هاریكار بیت.
