پارێزگارێ دهۆكێ: هەژمارەكا نوو یا پڕۆژەیێن خزمەتگوزاری ل سێمێلێ دێ هێنە بجهئینان
د بەردەوامیا سەرەدانێن خوە دا بۆ دەڤەرێن جودا یێن پارێزگەها دهۆكێ، د. عەلی تەتەر، پارێزگارێ دهۆكێ سەرەدانا دەڤەرداریا سێمێلێ كر و د گەل دا دەڤەردارێ سێمێلێ سەرەدانا ناڤەندا بازارێ سێمێلێ دا و ژ نێزیك گوهداریا داخوازی و گازندێن وەلاتیان كر.
پارێزگەها دهۆكێ د سەرەدانا خوە یا مەیدانی دا و د بەرسڤا داخوازیێن وەلاتیان دا راگەهاند: «ل دەمەكێ نێزیك دێ ب كۆمەكا دی یا پڕۆژەیێن گرنگ و نوو زڤڕینە سێمێلێ ڤە».
دیسا پارێزگارێ دهۆكێ دۆپاتكر رازیبوون ل سەر دروستكرنا یاریگەهەكێ بۆ یانا سێمێلێ هاتیە كرن و دێ چیتە د قووناغا بجهئینانێ دا، سەبارەت رێكئێخستنا سەنتەرێ باژێرێ سێمێلێ ژی گۆت: «مە بەرنامەك هەیە و هەژمارەكا پڕۆژەیێن نوو د دەمەكێ نێزیك دا دێ هێتە بجهئینان».
د سەرەدانا خوە دا بۆ سەنتەرێ باژێری پارێزگارێ دهۆكێ دەڤەردارێ سێمێلێ راسپارد هیچ پڕۆژەیەك نەهێتە راوەستاندن و بەردەوام دووڤچوون ل سەر بجهئینانا وان بهێتە كرن.
هەژی گوتنێ یە، بەری چەند رۆژان ب گوژمێ پتری 18 ملیار دیناران وەكو قووناغا ئێكێ رازیبوون بۆ دەڤەرداریا سێمێلێ هاتبووكرن.
