پارێزگارێ دهۆكێ: پێدڤیه ئه‌م هه‌موو كێمبوونا رێژا ده‌نگدانێ ب گرنگ وه‌ربگرین
ئه‌ڤرۆ:
د. عه‌لی ته‌ته‌ر، پارێزگارێ دهۆكێ دیار كر، د هه‌لبژارتنێن 10/10/2021 یێن به‌روه‌ختێن جڤاتا نوونه‌رێن ئیراقێ دا هنده‌ك خالێن ئه‌رێنی هه‌بوون و دبێژیت: گه‌لێ كوردستانێ ئه‌و په‌رله‌مانتارێن كورد یێن دژایه‌تیا كورد و كوردستانێ دكر ب توندی سزادان.
پارێزگارێ دهۆكێ د په‌یامه‌كێ دا كو ل سه‌ر مالپه‌رێ خوه یێ فه‌یسبووكی به‌لاڤكریه تێدا خویا كریه كو هه‌لبژارتن د سه‌قایه‌كێ ئارام و ب ئاریشه‌یێن گه‌له‌ك كێم ب رێڤه‌چوو و ده‌ستكاری د هه‌لبژارتنان دا نه‌هاته‌كرن، ب تنێ ئاریشا ته‌كنیكی هنده‌ك ئاسته‌نگ بۆ ده‌نگده‌ران په‌یداكرن و تێدا هاتیه: “كه‌ركووك، شنگال، زممار، ده‌شتا نه‌ینه‌وا و مه‌خمور كوردستانیه‌تا خوه سه‌لماند؛ هه‌رچه‌نده د داگیركری بوون و رێ ژی ل هه‌وا هه‌لبژارتنان ل به‌ربژارێن پارتی دهاته گرتن”.
د. عه‌لی ته‌ته‌ر، پارێزگارێ دهۆكێ د وێ په‌یاما خوه دا گۆتیه: “گه‌لێ كوردستانێ په‌رله‌مانتارێن كورد یێن به‌رێ، ئه‌وێن ل به‌غدا ب هه‌موو شیانان دژایه‌تا كورد و كوردستانێ دكرن، ب توندی سزادان و شه‌رمزاركرن، ئه‌ڤه ب خوه ژی سه‌ركه‌فتنه‌كا مه‌زن بوو”.
پارێزگارێ ئاشكرا ژی كریه كو ئه‌و لیستێن چو به‌رنامه و دیتن بۆ ڤان هه‌لبژارتنان نه‌یی و ب تنێ به‌رنامێ وان یێ هه‌لبژارتنان ل سه‌ر بنگه‌هێ دژایه‌تیكرنا پارتی دیمۆكراتی كوردستان هاتبوو داڕشتن، تووشی شكه‌ستنێ بوون؛ چونكی لیستا بێ به‌رنامه، هه‌ژی سه‌ركه‌فتنێ نینه، دیسا دوژمنێن كوردان و پێكڤه‌ژیانێ و ئه‌وێن ده‌ستێن وان ب خوینا پێشمه‌رگه‌ی سۆر، د ناڤ ئیراقێ دا خراب سه‌رشور و تووشی شكه‌ستنێ بوون.
پارێزگارێ دهۆكێ د دووماهیا په‌یاما خوه دا گۆتیه: “كێمبوونا رێژا ده‌نگدانێ، پێدڤیه ئه‌م هه‌موو ب گرنگ وه‌ربگرین و ب خوه‌دا بچینه‌ڤه”.
