پارێزگارێ دهۆكێ پێشوازیا نوونەرێن یانەیا دالكوردا سویدی كر
دوهی ل بارەگایێ خوە پارێزگارێ دهۆكێ د. عەلی تەتەر پێشوازیا نوونەرێن یانەیا دالكورد یا سویدی كرن ئەوێن پێكهاتی ژ هەژار مەعرۆف بەرپرسێ یاریزانێن یانەیێ ل رۆژهەلاتا ناڤەراست و رۆژنامەڤانێ دەزگەهێ خانی و كاپتنێ تیما تەپا پێی هارۆن ئەحمەد كوڕێ باژێرێ ئاكرێ.
د ڤێ سەرەدانێ دا نوونەرێن یانەیا دالكورد ب روونی شرۆڤەكرنا كار و چالاكیێن یانێ د خولا سویدی دا بۆ پارێزگارێ دهۆكێ دیار كر وەكو یانەیەكا كوردان ب ئالایێ خوەڤە ل وەلاتێ سوید و هەمی بزاڤێن وێ خرڤەكرنا یاریزانێن ڕەڤەندا كورد ل هەر جهەكێ دونیایێ بیت تایبەت یاریزانێن هەر چار پارچێن كوردستانێ.
ژلایێ خوەڤە د. عەلی تەتەر خوەشحالیا خوە ب سەرەدانا وان دەربری و داخوازا سەركەفتێ بۆ یانەیێ كر و دیار كر هەبوونا یانەكێ ب ئالایێ كوردستانێ و ناڤێ كوردی جهێ سەربلندیێ یە و هیڤی خواست ئەڤ یاریزانێن كوردستانێ زێدەتر دەلیڤا خوە بینن و ببیتە پرەك بۆ دیاركرنا ئاست و شیانێن یاریزانێن كورد ل ئۆرۆپا، ل دووماهیێ نوونەرێن یانەیا دالكۆر وەكو رێزگرتنەك درێسەكێ تایبەت یێ یانەیێ پێشكێشی پارێزگارێ دهۆكێ كر و سۆپاسیا وی هاتە كرن ب پێشوازی و دووڤچوونا بۆ یانەیا دالكۆرد.
بۆ زانین د ماوەیەكێ كێم دا شەش یاریزانێن كورد پەیوەندی ب یانەیا دالكورد كربوون ئەو ژی هارۆن ئەحمەد، فەرحان شكۆر، ئەیسەر قاسم، یێن كوردستانا رۆژهەلات بەختیاری رەحمان و فەرزین روباد، هەروەسان یاریزانێ خەلكێ سێمێلێ و رەڤەندا كورد رێوان ئەمین.
