پارێزگارێ دهۆكێ: ئەم یێ كار ل سەر كەلها نزاركێ دكەین و ئەڤ سالە دێ بیتە مۆزەخانە
ل ژێر درووشمێ (كورد و كوردستانی ب ئەنفال و كۆمكوژیان ناهێنە ژناڤبرن) دوهی بەری نیڤرۆ 27/8/2023 ل هولا كۆنفرانسان یا زانكۆیا دهۆك و ب چاڤدێریا د. عەلی تەتەر، پارێزگارێ دهۆكێ و و ب بەرهەڤبوونا چەندین بەرپرسێن حزبی و ئیداری و لەشكری و جەماوەری و كەسوكارێن قوربانیێن ئەنفالان رێورەسمێن بۆرینا 35 سالان ل سەر ئەنجامدانا ئەنفالێن بادینان ژ لایێ رژێما بەعس یا ژناڤچوویی ڤە هاتنە گێڕان.
ل بەراهیێ پێشانگەها وێنەیێن ئەنفالان هاتە نیشادان، پاشی ژیان مستەفا، رێڤەبەرا گشتی یا شەهید و ئەنفالكریان ل پارێزگەها دهۆكێ پەیڤەك پێشكێش كر و تێدا ئاماژە دا ڤێ تاوانا مەزن یا ژ لایێ دەستهەلادارێن بەعس ڤە هاتیە ئەنجامدان و خواست، كو حوكمەتا ئیراقێ قەرەبوویا زیاندارێن ئەنفالان بكەت.
د دووڤ دا نوونەرێ كەسوكارێن ئەنفالكریان یاداشتەك خواند و تێدا داخوازیێن ئەنفالكریان رادەستی پارێزگارێ دهۆكێ كر بۆ وێ یەكێ پارێزگارێ دهۆكێ وێ یاداشتنامێ بگەهینیتە لایەنێن پەیوەندیدار.
د. عەلی تەتەر، پارێزگارێ دهۆكێ د پەیڤەكێ دا گۆت: «ئەنفالێن بادینان تاوانەكا گەلەكا مەزن بوو، هەمبەر خەلكێ بادینان ژ كورد و مەسیحی و بوسلمان و ئێزدی و هەموو پێكهاتەیێن دی هاتیە ئەنجامدان، كو پتر ژ 488 گوندان هاتنە وێرانكرن و ب هزاران وەلاتی ئاوارەبوون و ب هزاران خەلكێ بێ گونەه ب دیل هاتنە گرتن و بێ سەروشوونكرن و چەندین پێشمەرگەه ژی هاتنە شەهیدكرن».
پارێزگارێ دهۆكێ سەرخوشی گەهاندنە هەموو بنەمالێن قوربانیێن ڤێ تاوانا مەزن و خواست هەموو زیاندارێن ئەنفالان بهێنە قەرەبووكرن و گۆت: «كەلها نزاركێ دێ كەینە مۆزەخانە، دیسا مۆنیۆمێنتا ئەنفالێن بادینان د ناڤ پاركا تاخێ پیشەسازی دا ل بەڕۆشكێ دێ هێتە دانان».
