پارێزگارێ دهۆكێ بۆ بازڕگانان: نابیت پاوانكاری بكه‌ڤیته د بازاڕی دا
ئه‌ڤرۆ:
د. عه‌لی ته‌ته‌ر، پارێزگارێ دهۆكێ و ب به‌رهه‌ڤبوونا حه‌مید عه‌لی، رێڤه‌به‌رێ كۆمه‌لگه‌ها ده‌رگه‌هێ نێڤده‌وله‌تی یێ ئیبراهیم خه‌لیل و شێخ ئه‌یاد حه‌سه‌ن، سه‌رۆكێ ژوورا بازرگانی و پیشه‌سازیا دهۆكێ دوهی 22/8/2021 ل گه‌ل هژماره‌كا بازرگانێن پارێزگه‌ها دهۆكێ كۆمبوو.
د كۆمبوونێ دا ل دۆر ره‌وشا لڤینا بازاری و بازرگانیێ و ئینانا كه‌لوپه‌ل و متایی و باج و رسوماتێن گومركی و وه‌رگرتنا ده‌ستووریا ئینانا كه‌لوپه‌لان دانوستاندن هاته‌كرن.
پارێزگارێ دهۆكێ د په‌یڤه‌كێ دا گۆت: “ئارمانجا مه ژ ڤێ روونشتنێ گوهداریا گازنده و پێشنیارانه و چاره‌سه‌ركرنا وان ئاریشانه بۆ هندێ د به‌رژه‌وه‌ندیا گشتی یا وه‌لاتیان دا بیت، دیسا یا مه پێ چێبیت د چارچووڤێ قانوون و رێنمایان دا دێ هاریكاریی و ئاسانكاریان بۆ بازرگانان كه‌ین و رۆتین بهێته كێمكرن”.
پارێزگاری گۆتژی: “نابیت پاوانكاری بكه‌ڤیته د بازاری دا و حوكمه‌تا خوه‌جهی به‌رده‌وام دووڤچوونا سه‌خته‌كاری و زێده‌گاڤیێن ل سه‌ر كه‌رتێ بازرگانی دكه‌ت”.
پارێزگارێ دهۆكێ دیار كر، بازرگان د دابینكرنا پشكه‌كا گرنگا پێدڤیێن رۆژانه یێن وه‌لاتیان دا پشكدارن و گۆت: “دوپات دكه‌ین یا مه پێ چێبیت بۆ ئاسانكاریان دێ ئه‌نجام ده‌ین، لێ ژ ده‌رڤه‌ی رێنما و قانوونان ئه‌م نه‌شێین پشته‌ڤانیێ ل پاوانكاریێ و خرابیێ بكه‌ین و هیڤیدارین ئه‌م هه‌موو پێكڤه بۆ به‌رژه‌وه‌ندیا گشتی یا وه‌لاتیان كار بكه‌ین”.
دیسا هه‌ر د كۆمبوونێ دا پارێزگارێ دهۆكێ داموده‌زگه‌هێن په‌یوه‌ندیدار راسپاردن بۆ ئه‌نجامدانا ئاسانكاری و هاریكاریان بۆ وێ یه‌كێ پاوانكاری نه‌كه‌ڤیته د پرۆسا بازرگانی و بازاری دا.
دیسا هه‌ر دوهی 22/8/2021 د. عه‌لی ته‌ته‌ر، پارێزگارێ دهۆكێ پێشوازی ل كلیمینس سمینته‌ر، قۆنسلێ گشتی یێ وه‌لاتێ ئه‌لمانیا ل كوردستانێ و شاندێ د گه‌ل دا كر و د هه‌ڤدیتنه‌كێ دا به‌حسێ په‌یوه‌ندیێن دو قولی د ناڤبه‌را هه‌رێما كوردستانێ و حوكمه‌تا ئه‌لمانیا و چاوانیا خورتكرنا وان په‌یوه‌ندیان د بیاڤێ سیاسی و ئابووری و ساخله‌می و كلتۆری و بیاڤێن دی دا و ره‌وشا ئاواره و په‌نابه‌ران هاته كرن.
قۆنسلێ ئه‌لمانیا ته‌كه‌ز كر كو حوكمه‌تا ئه‌لمانیا ب رێكا سازیێن خوه دێ به‌رده‌وام هاریكاریێن مرۆڤایه‌تی پێشكێشی هه‌رێما كوردستانێ كه‌ت.
دیسا هه‌ر دوهی د. عه‌لی ته‌ته‌ر، پارێزگارێ دهۆكێ پێشوازی ل جاك مورگان، رێڤه‌به‌رێ رێكخراوا MAG ل هه‌رێما كوردستانێ كر و ب به‌رهه‌ڤبوونا خانم “شیلان سامر” رێڤه‌به‌را گشتی یا كاروبارێن مینان ل پارێزگه‌ها دهۆكێ به‌حس ل كار و چالاكیێن رێكخراوا ناڤبری د ده‌مێ 29 سالێن بوۆری دا و به‌رنامێ وان بۆ داهاتی هاته‌كرن.
