پارێزگارێ دهۆكێ بەرێ بنیاتی بۆ هەژمارەكا پڕۆژەیان ل ئامێدیێ دانا
د عەلی تەتەر، پارێزگارێ دهۆكێ و شاندەكێ د گەل دا سەرەدانا دەڤەرا ئامێدیێ كر و ب بەرهەڤبوونا وارشین سەلمان، دەڤەردارێ ئامێدیێ و بەرەڤان حەمدی، بەرپرسێ لقێ 18 یێ پارتی و رێڤەبەرێ گشتی یێ ساخلەمیا دهۆكێ و رێڤەبەر و بەرپرسێن دام و دەزگەهێن میری و كەسایەتی و وەلاتیێن دەڤەرێ نەخۆشخانا هیوا یا تایبەت ل ناوچەداریا شێلادزێ هاتە ڤەكرن و ل سەنتەرێ دەڤەرداریێ ژی پارێزگارێ دهۆكێ بەرێ بنیاتی بۆ پڕۆژێ كۆمەلگەها گەشتیاری یا سیلاڤێ دانا، كو ژ هۆتێل و مۆتێلان پێك دهێت، هەروەسا بەرێ بنیاتی بۆ هۆتیلەكا پێنج ستێر ل سیلاڤێ دانا.
پارێزگارێ دهۆكێ سەرەدانا ناوچەداریا دێرەلۆكێ ژی كر و ل جهەكێ گشتی د ناڤا بازاری دا ل گەل وەلاتیان روونشت و دانوستاندنەكا ڤەكری ل دۆر ئاریشە و داخوازیێن خەلكێ وێ نوچەداریێ ل گەل وان ئەنجام دا و گۆت: «یا د شیان دا بیت، بۆ خزمەتكرنا خەلكێ دڤەرێ دێ ئەنجام دەین».
دیسا د. عەلی تەتەر، پاێزگارێ دهۆكێ د كۆنگرەكێ رۆژنامەڤانی دا دیار كر، پشتی سەردانا جەنابێ سەرۆك بارزانی بۆ دەڤەرا بەهدینان، هەر زوو پشكەك ژ داخوازیێن وەلاتیێن دەڤەرا ئامێدیێ رازیبوون ل سەر هاتە كرن و گوژمەكێ پارەی بۆ هاتە تەرخانكرن و كەفتنە د بیاڤێ بجهئینانێ دا و پشكەك ژ ئاریشەیێن وەلاتیان ژی هاتنە چارەكرن و گۆت: «ئاریشەیا ئاكنجیێن خیڤەتگەها شیفچناركێ و ئاكنجیێن شقێن سكەی نوكە چارەسەر بوویە، بۆ هەر خێزانەكێ پارچەكا ئەردی و گوژمەكێ پارەی هاتینە تەرخانكرن».
زێدەتر گۆت: «ل سیلاڤێ ژ بۆ نەهێلانا قەرەبالغیا ترۆمبێلان دەست ب دروستكرنا پاركەكێ و هۆتێلەكێ هاتیە كرن».
پاێزگارێ دهوكێ ڕاگەهاند: هەژمارەكا زۆرا پڕۆژەیێن گرنگ ل سنوورێ پارێزگەهێ ژ ئەگەرێ هەبوونا چەكدارێن پەكەكێ و شەڕێ بەردەوامێ ل وان دەڤەران ڤەماینە و نەهاتینە تەمامكرن.
