پارێزگارێ دهۆكێ: خزمەتگوزاریێن پێدڤی بۆ چاكسازیا مەزنان دێ هێنە دابینكرن
ژ پێخەمەت سەحكرنا رەوشا چاكسازیا مەزنان ل دهۆكێ و ئەو خزمەتگوزاریێن دهێنە پێشكێشكرن، دوهی 20/4/2025 د. عەلی تەتەر، پارێزگارێ دهۆكێ سەرا چاكسازیا مەزنان ل تاخێ زركا ل دهۆكێ دا و ژ لایێ عەقید ئارام محەمەد، رێڤەبەرێ چاكسازیێ و كارمەندێن وێ پێشوازی لێ هاتە كرن.
پاشی پارێزگارێ دهۆكێ سەرەدانا هول و پشكێن چاكسازیێ و هۆبێن پیشەیی كر و ژ نێزیك سەحكرە رەوشا روونشتڤانێن چاكسازیێ و ئەو خزمەتگوزاریێن بۆ دهێنە پێشكێشكرن.
پارێزگارێ دهۆكێ داكوكی ل سەر گەهاندنا باشترین خزمەتگوزاریێن ساخلەمی و خوارن و ڤەخوارنێن ساخلەم و پاقژیا بەردەوام و خزمەتێن دی یێن مرۆڤایەتی كر و هیڤی خواستن هەموو گرتی ب زووترین دەم ئازادببن و ڤەگەڕنە ناڤ كەسوكارێن خۆ و ببنە كەسانێن ئاڤاكەر دناڤ جڤاكی دا و پشتەڤانیا پارێزگەهێ بۆ هەر هاریكاریەكێ دیاركر.
دیسا هەر دوهی 20/4/2025 د. عەلی تەتەر، پارێزگارێ دهۆكێ سەرا دێرا قەدیس مار نارسیس شنوهای یا ئەرمەنیا دا ژ لایێ مەتران ئازاد مەترانێ كلدانیا و مار ئەپرێس مەترانێ ئاشووریا و دێرماسیس مەترانێ ئەرمەنیا پێشوازی لێ هاتە كرن و پارێزگارێ دهۆكێ بناڤێ خۆ و كارگێریا پارێزگەهێ و خەلكێ دەڤەرێ جەژنا قیامە ل خوشك و برایێن مەسیحی پیرۆزكر و هیڤی خواستن ئەڤ جەژنە و هەموو جەژنێن دی ب خێر و خۆشی و ب گیانێ لێبۆرین و پێكڤەژیانا ئولی و نەتەوەیی بهێنە گێڕان.
دیسا هەر دوهی 20/4/2025 د. عەلی تەتەر، پارێزگارێ دهۆكێ ب ئامادەبوونا وارشین سەلمان، دەڤەردارێ ئامێدیێ هەڤدیتنەك ل گەل ئەمیر عەلی، رێڤەبەرێ گشتی یێ رەوشەنبیری و هونەری ل پارێزگەهێ و مامۆستا تەحسین ئیبراهیم دۆسكی كر و د هەڤدیتنێ دا بەحسێ بزاڤا رەوشەنبیری و ئەدەبی، نەخاسمە ئەدەبێ كلاسیكی و چاوانیا پێشئێخستنا وی هاتەكرن.
پارێزگارێ دهۆكێ بەرهەڤیا پارێزگەهێ بۆ چاپكرنا بەرهەمێن ئەدبێ كلاسیكی و هەموو بەرهەمێن رەوشەنبیری و نەتەوەیی و نیشتمانی دیاركر.
