پارێزگارێ دهۆكێ دووڤچوونا پڕۆژەیێن ئاكرێ دكەت
رەمەزان زەكەریا:
دكتۆر عەلی تەتەر، پارێزگارێ دهۆكێ دوهی 16/3/2025 سەردانا دەڤەرداریا ئاكرێ كر و ب سەردانەكا مەیدانی چەندین پڕۆژە دیتن و هایداری دووماهی بەرهەڤیێن كەرنەڤالا نەورۆزێ ژی بوو.
د. عەلی تەتەر، پارێزگارێ دهۆكێ د سەردانا خوە دا بۆ ئاكرێ دەستپێكێ بۆ رێزگرتن ل گیانێ پێنج هزار شەهیدێن كێمیابارانكرنا هەلەبجە پێنج خولەكا راوەستان و گۆت: «تاوانەكا مەزنە دەرهەق خەلكێ هەلەبجە ژ لایێ رژێما بەعسا ژناڤچۆیی ڤە هاتیە كرن». پارێزگارێ دهۆكێ د بەردەوامیا سەردانا خوە دا ل گەل دەڤەردارێ ئاكرێ و سەرۆكێ باژێرڤانیا ئاكرێ و رێڤەبەرێ ئاڤا ئاكرێ و هژمارەكا رێڤەبەرێن دی یێن حكومی ل ئاكرێ سەرەدانا هەر ئێك ژ پڕۆژەیێ جاددەیا سەرێ گری و دووماهی بەرهەڤیێن كەرنەڤالا نەورۆزێ بوو.
دیسا پارێزگارێ دهۆكێ سەرەدانا پڕۆژەیێ تەمامبوونا گرێدانا بۆریێن ئاڤا ئاكرێ یێ ستراتیژی بۆ عمبارا ئاڤێ ل گرێ تۆپا كر، كو پرۆژەكێ مەزنە، ژ زێی بۆ ئاكرێ دهێتە راكێشان، ژ ئەگەرێ بڕینا بودجەیا كوردستانێ ژ لایێ ئیراقێ ڤە پڕۆژە گیرۆبوو، نوكە ل سەر داهاتێ ناڤخۆ دهێتە تەمامكرن و هەتا نوكە 70% پڕۆژە ب دووماهی هاتیە.
پارێزگارێ دهۆك گۆت: «پڕۆژەیێ جۆتسایدێ ئاكرێ بۆ قەندیلی، ل گەل چەندین پڕۆژەیێن ناڤخۆ ل ناڤ ئاكرێ كاركرن ل سەر بەردەوامە، دیسا ئاریشا ترافیكێ ل ئاكرێ ل رۆژێن نەورۆزێ ب ڤەكرنا جادەیەكا نوو دێ قەرەبالغی كێم بیت، ژ بەركو ئاكرێ ب پایتەختێ نەورۆزێ هاتیە ناسین، ژ بەر ڤێ چەندێ دبیتە قەرەبالغ».
