پارێزگارێ دهۆكێ سەرا پاركا سەرهلدان دا و هندەك رێنومایی دان
د. عەلی تەتەر، پارێزگارێ دهۆكێ دوهی 23/9/2025 سەرا پاركا سەرهلدان دا و ژ لایێ ئیسماعیل مەحەمەد، دەڤەردارێ دهۆكێ و مللەت سالم، سەرۆكێ باژێرڤانیا دهۆكێ پێشوازی لێ هاتە كرن.
پارێزگارێ دهۆكێ گەڕیانەك د ناڤ پاركێ دا كر و ژ نێزیك سەحكرە رەوشا پاركێ و پاقژیا وێ و دووبارە ئەڤ پاركە ل هەموو خەلكێ پارێزگەهێ و ب تایبەتی ل خەلكێ تاخێن رۆژهەلاتێ باژێری پیرۆزكر و داخواز ژ وەلاتییان كر كو جوانی و پاقژیا پاركێ باش بپارێزن و گلێش و بەرمایكێن خۆ دانە د ناڤ وان سەتل و تەنەكێن پلاستیكی دا یێن هەر ل دەست پێكێ د ناڤ پاركی دا هاتینە دانان.
پارێزگاری گۆت: «ئەڤە چەند رۆژەكن هەوێن پاقژكرنا جادەیێن سەرەكی و لاوەكی دەست پێكریە و تیمێن تایبەت دووڤچوونا پرۆسەیا پاقژكرن و پاراستنا ژینگەهێ دكەن و ژ ئەڤرۆ وێڤە هەر كەسەك یان ترۆمبێلەكا گلێشی یان بەرمایكان نەدانیتە وان جهێن دەستنیشان كری ل دووڤ رێنومایان و یاسایان دێ هێتە سزادان و دوپاتكر، پاقژی و پاراستنا ژینگەهێ ئەركەكێ نیشتمانی و نەتەوەیی و ئاینی یە، دڤێت هەموو وەلاتی د هاریكاربن و ئاخ و ژینگەها دەڤەرێ پاقژڕاگرن».
