پارێزگارێ دهۆكێ سەرپەرشتیا كۆمبوونەكێ ل دۆر پرۆسەیا ئەنجامدانا هەلبژارتنان كـر
وەكو بەرهەڤی بۆ سەرئێخستنا پرۆسەیا ئەنجامدانا هەلبژارتنێن جڤاتا نوونەرێن ئیراقا فیدرال، د. عەلی تەتەر، پارێزگارێ دهۆكێ و ب ئامادەبوونا خالد عەباس، بەرپرسێ لقێ دهۆكێ یێ كومسیۆنا سەربخۆ یا هەلبژارتنێن ئیراقێ، دوهی 20/8/2025 سەرپەرشتیا كۆمبوونا لیژنا ئەمنی ل دۆر پرۆسەیا ئەنجامدانا هەلبژارتنێن جڤاتا نوونەرێن ئیراقا فیدرال كر.
پارێزگارێ دهۆكێ گرنگیا ئەنجامدانا پرۆسەیا هەلبژارتنێن جڤاتا نوونەرێن ئیراقا فیدرال بەرچاڤكر و گۆت: «هەر لایەك ل دووڤ بەرپرسیاریا خوە ب ئەرك و كارێن خوە رابیت و وەلاتییان هان بدەن، كو ب رێژەكا بەرچاڤ پشكداریێ د پرۆسەیا دەنگدانێ دا بكەن، بزاڤێ بكەن، ئەڤ پرۆسە ب رەنگەكێ ئارام و ئازاد و دیموكراسی و ل دووڤ رێنما و یاسایێن كومسیۆنا هەلبژارتنان بهێتە ئەنجامدان و روویێ جوان و شارستانی یێ پارێزگەهێ نیشا بدەن و پشتەڤانیا خۆ بۆ هەر هاریكاریەكێ دیاركر».
بڕیارە ل رێكەفتی 11/11/2025 پرۆسەیا هەلبژارتنێن جڤاتا نوونەرێن ئیراقا فیدرال بهێتە ئەنجامدان، ل پارێزگەها دهۆكێ 785 هزار كەسان ماف هەیە پشكداریێ د ڤێ پرۆسێ دا بكەن.
دیسا هەر دوهی 20/8/2025 د. عەلی تەتەر، پارێزگارێ دهۆكێ پێشوازیا د. نافسەر نوری، بریكارێ وەزارەتا شەهید و ئەنفالكریا كر و د هەڤدیتنەكێ دا ب ئامادەبوونا خاتوون ژیان مستەفا، رێڤەبەرا گشتی یا شەهید و ئەنفالكریان ل پارێزگەهێ و چەند رێڤەبەرێن پەیوەندیدار، بەحسێ بەرنامێن وەزراەتا شەهید و ئەنفالكریان بۆ ساخكرنا رێورسمێن بیرهاتنا بۆرینا 37 سالان ل سەر ئەنفالێن دەڤەرا بەهدینان كر، كو بڕیارە ئەڤ سالە ل سنۆرێ ناوچەداریا سەرسنكێ ل رۆژا دوشەمبی 25/8/2025 بهێنە ئەنجامدان.
