پارێزگارێ دهۆكێ ل دۆر مەها رەمەزانێ سەرپەرشتیا كۆمبوونەكێ كر
د. عەلی تەتەر، پارێزگارێ دهۆكێ ل رۆژا 10/3/2024 كۆمبوونەك ل دۆر رێنمایێن مەها رەمەزانا پیرۆز و هەژمارەكا بابەتێن گشتی ب ئامادەبوونا جێگرێن پارێزگاری و دەڤەردارێن پارێزگەهێ و هەژمارەكا رێڤەبەریێن پەیوەندیدار كر.
ل دەستپێكێ پارێزگارێ دهۆكێ ب هەلكەفتا هاتنا مەها رەمەزانا پیرۆز پیرۆزباهی ئاراستەی هەمی موسلمانێن هەرێما كوردستانێ، ب تایبەتی موسلمانێن پارێزگەها دهۆكێ كرن و هیڤیا هەیڤەكا پری خێر و بەرەكەت بۆ گەل و وەلاتێ مە خواست.
پاشی لایەنێن پەیوەندیدار راسپاردن پێگیری ب رێنمایێن وەزارەتا ئەوقاف و كاروبارێن ئایینی د مەها رەمەزانا پیرۆز دا بهێتە كرن.
ل دووڤ دا پارێزگارێ دهۆكێ باس ل بیرەوەریێن مەها ئادارێ و نەورۆزێ و چاوانیا زیندی راگرتنا چالاكیان كر.
د كۆمبوونێ دا پارێزگارێ دهۆكێ باس ل پڕۆژەیێن خزمەتگوزاری یێن پارێزگەها دهۆكێ و لەز ل دەستپێكرنا پڕۆژەیێن نوو و خزمەتكرنا گشتی كر.
پارێزگارێ دهۆكێ ل دووماهیێ د كۆنگرەكێ رۆژنامەڤانی دا ب تێروتەسەلی بابەتێن كۆمبوونێ بۆ رایا گشتی راگەهاندن.
دیسا دوهی ١١ی ئادارا ٢٠٢٤ێ د. عەلی تەتەر، پارێزگارێ دهۆكێ ب ئامادەبوونا محەمەد خالد، رێڤەبەرێ گشتی یێ ئەوقاف و كاروبارێن ئایینی و رێڤەبەرێن ئەوقافێن دەڤەرداریێن پارێزگەها دهۆكێ سەرپەرشتیا كۆمبوونەكێ كر.
د كۆمبوونێ دا پارێزگارێ دهۆكێ دووبارە پیرۆزباهی ئاراستەی موسلمانێن كوردستانێ و پارێزگەها دهۆكێ ب هەلكەفتا هاتنا مەها رەمەزانا پیرۆز كرن.
پاشی دۆپاتی ل بجهئینانا رێنمایێن وەزارەتا ئەوقاف و كاروبارێن ئایینی و رێزگرتنا مەها رەمەزانێ و خورتكرنا گیانێ مرۆڤایەتی و هاریكاریا هەژار و كێمدەرامەتان كر.
