پارێزگارێ دهۆكێ: نەخۆشخانا 100 تەختی یا ئامێدیێ ل مەها 10 دێ ب دووماهی هێت
دكتۆر عەلی تەتەر، پارێزگارێ دهۆكێ سەرەدانا دەڤەرا ئامێدیێ كر و ب هەڤالینیا بەرەڤان حەمدی، بەپرسێ لقێ 18 یێ پارتی و وارشین سەلمان، دەڤەردارێ ئامێدیێ و هەژمارەكا بەرپرسێن میری و حزبی سەرەدانا چەندین جهێن دەڤەرا ئامێدیێ كر، ژ وانا ژی، ئاڤا روویێ شین ل شێلادزێ و پڕۆژەیێ نەخۆشخانا 100 تەختی و گەلیێ شێرانە ل دێرەلۆكێ و ژ نێزیك ئاگەهداری رەوشا وان دەڤەران بوو.
، دكتور عەلی تەتەر، پارێزگارێ دهۆكێ ل جهێ پرۆژێ نەحۆشخانا 100 تەختی ل دێرەلۆكێ د كۆنگرەكێ رۆژنامەڤانی دا دیار كر، وی سەرەدانا ڤێ دەڤەرا د ناڤبەرا ڤان هەردو چیایان دا كریە، كو دبێژنە ڤێ دەڤەرێ، دەشتا زێ و ئاكنجیێن ڤێ دەڤەرێ بارا پترێ ئەون یێن پشتا چیایێ لینكی و چیایێ مەتینا هاتین و خەلكێ ڤێ دەڤەرێ قوربانیێن زۆر داینە هەر ل دەمێ دەسپێكا شۆڕەشێن كوردی و هەتا نوكە و گۆت : ژ بەر شەڕێ پەكەكێ و توركیا و سیاسەتا پەكەكێ هەتا نوكە خەلكێ ڤان گوندان نەشیاینە بچنە سەر گوندێن خوە و ژ بەر وێ یەكێ ژی خەلكێ ڤان گوندان ل ڤێ دەڤەرێ كومبووینە و قەرەبالغەكا زۆر ل ڤێ دەڤەرێ دروستبوویە و سێ چار باژێركێن مەزن ل ڤێ دەڤەرێ دروستبووینە».
پارێزگاری ئاشكرا ژی كر، حوكمەتا هەرێما كوردستانێ ژی بزاڤ كرینە پڕۆژەیێن باش بینیتە ڤێ دەڤەرێ و گۆت: «پڕۆژەیێ نەخۆشخانا 100 تەختی ل كۆمەلگەها هێتووتێ، كو پڕۆژەكێ هەرە گرنگێ ڤێ دەڤەرێ یە، د ناڤبەرا ناوچەداریا دێرەلۆكێ و شێلادزێ دا دهێتە چێكرن، بڕیارە ل دووماهیا مەها 10 یا ئەڤ سالە پڕۆژە ب دووماهی بهێت و بكەڤیتە د خزمەتا خەلكێ دەڤەرێ دا».
دیار ژی كر، ل گەلیێ رەشاڤە، ل ڤێ دەڤەرێ پڕۆژەیێ هایدروپاوەر لێ دهێتە دانان، كو دشێت كارەبێ بەرهەم بینیت و دۆرێن 160 ملیۆن دولاران بۆ هاتینە تەرخانكرن، زێدەباری دابینكرنا كارەبێ ئاڤا ڤەخوارنێ بۆ ڤێ دەڤەرێ ل ڤی گەلی دهێتە دابینكرن.
ل دۆر كۆڕنیشێ روویێ شین ل شێلادزێ پارێزگارێ دهۆكێ گۆت: «ژ بەركو خەلكەكێ زۆر قەستا روویێ شین ل شێلادزێ دكەت، ژ بەر وێ یەكێ ژی مە دەڤەردار و رێڤەبەرێ ناوچەداریێ راسپاردن، كو ڤەدیتنەكێ بۆ دروست بكەن و ئەم ل گەل جەنابێ سەرۆكێ حوكمەتێ ئاخڤتینە بۆ كۆڕنیشكرنا رەخێن ڤی رووباری و چێكرنا پڕۆژەكێ گەشتیاری ل سەر ڤی رووباری».
پارێزگارێ دهوكێ گۆتژی: «چێكرنا یاریگەهەكا تەپا پێ بۆ یانا شێلادزێ رازیبوون ل سەر هاتیەكرن، دیسا كۆمەكا دی ژی یا پڕۆژان هەنە، كو د داهاتی دا دێ هێنە راگەهاندن و دێ ل ڤێ دەڤەرێ هێنە چێكرن و ب چێكرنا ڤان پڕۆژەیان دێ پتر خزمەتا خەلكێ ڤێ دەڤەرێ هێتە كرن و دێ پتر دەڤەر گەشەكرنێ ب خوەڤە بینیت».
