پارێزگارێ دهۆكێ هه‌ژماره‌كا پڕۆژه‌یان ل ده‌ڤه‌را ئامێدیێ ڤه‌كرن
ئامێدیێ، مه‌حمود نهێلی:
د سه‌ره‌دانه‌كێ دا بۆ ده‌ڤه‌را ئامێدیێ دكتۆر عه‌لی ته‌ته‌ر، پارێزگارێ دهۆكێ و شانده‌كێ دگه‌ل دا، هه‌ژماره‌كا پڕۆژه‌یان ل ناوچه‌دارییا سه‌رسنكێ ڤه‌كرن و په‌رده ژی ل سه‌ر په‌یكه‌رێ شه‌هید عه‌بدولعه‌زیز لادا.
دكتۆر عه‌لی ته‌ته‌ر، پارێزگارێ دهۆكێ د كۆنگره‌كێ رۆژنامه‌ڤانی دا ل سه‌رسنكێ دیار كر، ئه‌ڤرۆ ئه‌م یێن ده‌ڤه‌را ئامێدیێ به‌رهه‌ڤبووین ژ بۆ ڤه‌كرنا هه‌ژماره‌كا پڕۆژه‌یان ل ڤێ ده‌ڤه‌رێ كو به‌ری نوكه رازیبوون ل سه‌ر هاتبوو كرن و یێن كه‌فتینه د خزمه‌تا وه‌لاتیان دا، هه‌ژماره‌كا ژ وان پرڕۆژه‌یێن جاده و كولانا و هه‌ژماره‌كا پڕۆژه‌یێن گه‌شتیاری بوون و گۆت: (ئۆتێلا به‌ری ژی گه‌له‌ك نه‌مایه دێ ب داوی هێت و رازیبوون ل سه‌ر هه‌ژماره‌كا دی ژی یا پڕۆژه‌یێن باش یێن گه‌شتیاری بۆ ناوچه‌دارییا سه‌رسنكێ هاتینه و دێ ل نێزیک به‌رێ بنیاتی بۆ هێته دانان.
هه‌ر د ڤێ سه‌ره‌دانێ دا پارێزگارێ دهۆكێ و شاندێ د گه‌ل دا ، ل سه‌نته‌رێ ده‌ڤه‌رداریا ئامێدیێ په‌رده ل سه‌ر په‌یكه‌رێ شه‌هید عزه‌ت عه‌بولعه‌زیز لادا و دیار كر، ب هه‌لكه‌فتا دامه‌زراندنا كۆمارا كوردستان ل مههابادێ پیرۆزباهیان ئاراسته‌ی ته‌ڤایا گه‌لێ كوردستانێ دكه‌ین و سه‌رێ رێز و نه‌وازشێ بۆ شه‌هیدێن كۆمارا كورستانێ دچه‌مینین و گۆت: (ب ڤێ هه‌لكه‌فتێ ئه‌ڤرۆ مه په‌یكه‌ره‌كێ نوو یێ شه‌هید عزه‌ت عه‌بولعه‌زیز ل ئامێدیێ دانا و سه‌رێ رێز و نه‌وازشێ بۆ ڤی شه‌هیدی و هه‌ر سێ هه‌ڤالێن وی دچه‌مینین و رێزێن مه بۆ مالباتێن وان ژی هه‌نه).
ناڤبری ئاماژه كره رۆلێ بارزانیێ نه‌مر د دامه‌زراندنا كۆمارا كورستانێ دا و ئاشكرا ژی كر ، رۆلێ ڤان هه‌ر چار ئه‌فسه‌رێن كوردێن كۆمارا كورستانێ كو ژلایێ حكومه‌تا ئیراقێ یا وی ده‌می ڤی هاتیه سێداره‌دان یێ به‌رچاڤه و دێ مینت بۆ دێرۆكێ و بەرەبابێ نوكه و یێن داهاتی كا چاوا ئه‌م گه‌هشتینه ڤێ قووناغێ
