پارێزگارێ دهۆكێ: پارزنگەهێن نەیاسایی دێ هێنە دائێخستن
زنار تۆڤی:
د. عەلی تەتەر، پارێزگارێ دهۆكێ دوهی 13/1/2025 ل دۆر پاراستن و پاقژ ڕاگرتنا ژینگەهێ، ل گەل دەڤەردار و رێڤەبەریێن پەیوەندیدار كۆمبوو، پاشی د كۆنفرانسەكێ رۆژنامەڤانی دا چەندین بڕیارێن حكومەتا هەرێما كوردستانێ ل دۆر پاقژ ڕاگرتنا ژینگەهێ دیاركرن و دبێژیت: دڤێت هەموو بڕیار و راسپاردە ب هووری ژ لایێ فەرمانگەهێن پەیوەندیدارڤە بهێنە بجهئینان.
پارێزگارێ دهۆكێ، هیڤی خواست هەموو لایەن و وەلاتی ژی پێگیریێ پێ بكەن و بجهبینن و سەرپێچیكار ژی ل دووڤ یاسا و رێنمایان دێ هێنە سزادان و گۆت: «هەموو پارزنگەهێن نەیاسایی و مەرجێن كاركرنێ ل دەڤ نەبن، ئێكسەر دێ هێنە دائێخستن، دیسا یێ بڤێت پارزنگەهەكێ ڤەكەت، دڤێت ل دووڤ رێنمایێن وەزارەتا سامانێن سروشتی بیت، هەر كارگەهەكا ل دووڤ مەرجێن حكومەتا هەرێمێ كارنەكەت و ژینگەهێ تێك بدەت دێ هێتە داخستن، هەر ئامیرەك یان موەلیدەكێ دووكێلێ و دەنگی بكەت و ژینگەهێ پیس بكەت دێ هێتە داخستن و دڤێت فیلتەر ل سەر بهێنە دانان و بهێنە بێدەنگكرن، هەموو جۆرێن سۆتەمەنیێ ئەوێن دهێنە دناڤ هەرێمێ و پارێزگەهێ دا و ئەوێن ل ناڤخۆ ژی دهێنە بەرهەمئینان، دڤێت ژ جۆرێن باش بن و ل دووڤ ستانداردێن وەزارەتا سامانێن سروشتی بن، راگرتنا وان ترۆمبێلا ئەوێن دوكێلا پیس ل ناڤ باژێری دكەن و دبنە ئەگەرێ پیسكرنا ژینگەهێ و ساخلەمیا گشتی یا وەلاتیان، نەهێلانا وان بیستانێن كەسكاتیێ ل بەر ئاڤا پیس دچینن، نەهێلانا دیاردا سۆتنا گیایی ل ناڤ زەڤیێن چاندنێ و هاڤێتنا بەرمایكێن ئاڤاهی و خانیان ل جهێن دەست نیشان نەكری».
