پارێزگارێ دهۆكێ: پڕۆژە ب یەكسانی و ل دووڤ پێدڤیێن هەر دەڤەرەكێ دهێنە دابینكرن
د. عەلی تەتەر، پارێزگارێ دهۆكێ و ئەندامێ كۆمیتا ناڤین یا پارتی دیموكراتی كوردستان دوهی 24/7/2023 سمینارەك بۆ كادرێن خولا رەوشەنبیری یا ئێكێ یا كادرێن مەكتەبا رێكخستنا پارێزگەها دهۆكێ یا پارتی پێشكێش كر.
پارێزگارێ دهۆكێ د سمینارێ دا ئاماژە دا رۆلێ حوكمەتا هەرێما كوردستانێ بۆ گەهاندنا هەموو جۆرێن پڕۆژەیێن خزمەتگوزاری د كەرتێن ئاڤ و ئاڤەرۆ، پەروەردە، رێك و رێباران، ساخلەمیێ، چاندنێ و…هتد و گۆت: «ئەم بزاڤان دكەین پڕۆژەیان ب یەكسانی و ل دووڤ پێدڤیێن هەر دەڤەرەكێ بۆ خەلكێ خوە دابین بكەین، د ڤان چەند سالێن بۆری دا ب سەدان پڕۆژەیێن بچووك و ناڤین و ستراتیژی و مەزن ل سەرانسەری پارێزگەها دهۆكێ هاتینە ئەنجامدان و كاروانێ ئاڤەدانیێ یێ بەردەوامە».
پارێزگارێ دهۆكێ ئاماژە دا رەوشا پێكڤەژیانا ئولی و نەتەوەیی ل دەڤەرێ و گۆت: «پێدڤی یە بەردەوام گیانێ برایەتی و پێكڤەژیانێ ب سەرەدەریەكا كوردستانی پەیرەو بكەین، دیسا چارەنڤیسێ خەلكێ كوردستانێ ب هەموو پێكهاتەیان ڤە ل ڤێ هەرێمێ ئێكە و دڤێت هەموو ب هەڤرا ڤان دەستكەفتان ب پارێزین و خزمەتا كوردستانێ بكەن».
د. عەلی تەتەر ل دووماهیێ گۆت: «دڤێت كادرێن حزبی و ئیداری پتر د هەڤكار بن و پتر خوە ل ئێش و ئازار و پێدڤیێن خەلكێ دەڤەرێ بكەنە خودان، خەباتێ بكەن ژین و ژیارا وەلاتیان پتر خوەش بكەن».
دیسا هەر دوهی ب بەرهەڤبوونا د. عەلی تەتەر، پارێزگارێ دهۆكێ و عەلی خەلیل، بەرپرسێ لقێ 14 یێ پارتی دیموكراتی كوردستان ل مووسل و سیروان رۆژبەیانی، جێگرێ پارێزگارێ نەینەوا و خەلیل محمود، دەڤەردارێ سێمێلێ ب گوژمێ 11 ملیار و 500 ملیۆن دیناران بەرێ بنیاتی بۆ هەژمارەكا پڕۆژەیان هاتە دانان و هندەكێن دی ژی هاتنە ڤەكرن.
