پارێزگارێ دهۆكێ پێشانگەها دویێ یا بازاڕگەریا مسری ڤەكر
د. عەلی تەتەر، پارێزگارێ دهۆكێ ب بەرهەڤبوونا سەرۆك و ئەندامێن ژوورا بازرگانیا دهۆكێ و بازرگانێن بیانی دوهی 18/9/2023 ل هولا ئوسكار ل سەنتەرێ باژێرێ دهۆكێ پێشانگەها دویێ یا بازارگەریا مسری ڤەكر و گەڕیانەك د ناڤ پشكێن پێشانگەهێ دا كر و ژ نێزیك سەحكرە بەرهەمێن د ناڤ دا هاتینە بەرچاڤكرن.
پارێزگارێ دهۆكێ دەستخۆشی ل رێكخەرێن پێشانگەهێ كر و هیڤی خواستن، كو ئەڤ جۆرە پێشانگەهە ببنە هاندەرەك، پەیوەندیێن بازرگانی د ناڤبەرا بازرگانێن هەرێمێ و وەلاتێ مسرێ دا پتر خۆرت ببن و پشتەڤانیا پارێزگەهێ بۆ هەر هاریكاریەكێ دیار كر.
هەژی گۆتنێ یە، پێشانگەه بۆ دەمێ 10 رۆژان دێ یا ڤەكری بیت و ب رەنگەكێ ئێكسەر بەرهەمێن د ناڤ دا دێ هێنە فرۆتن، 45 كۆمپانیێن مسری و خومالی یێن كوردستانێ و كۆمپانیێن وەلاتێن (هندستانێ، ئیرانێ، سووریا، فەلەستین، ئوردن و هتد…) پشكداری د پێشانگەهێ دا كریە و بەرهەمێن كارێن دەستی و كلتۆری و ئاهێن خوارنێ و جلك و سپیاتی و شریناهی و موبیلیات و…هتد د ناڤ دا هاتینە بەرچاڤكرن.
دیسا هەر دوهی د. عەلی تەتەر، پارێزگارێ دهۆكێ ل كوچكا دەڤەرداریا سێمێلێ هەڤدیتنەك ل گەل (ئوشگان گولگولیان) مەترانێ ئەرمەنان ل ئیراقێ سازكر و د هەڤدیتنێ دا بەحسێ رەوشا پارێزگەها دهۆكێ و پێكڤەژیانا ئایینی و نەتەوەیی ل دەڤەرێ و پڕۆژەیێن حوكمەتا هەرێما كوردستانێ هاتە كرن.
پاشی د. عەلی تەتەر، پارێزگارێ دهۆكێ ب بەرهەڤبوونا خەلیل مەحمود، دەڤەردارێ سێمێلێ و (ئوشگان گولگولیان) مەترانێ ئەرمەنان ل ئیراقێ و هەژمارەكا رێڤەبەرێن پەیوەندیدار بەرێ بنیاتی بۆ چێكرنا رێكا گوندێ هەورێسكی و پێنج گوندێن دی ب درێژاهیا چار كیلۆمەتر و 300 مەتران دانا.
