پارێزگارێ دهۆكێ پێشوازی ل قونسلێ بەرێ یێ كۆمارا ئیرانێ ل هەرێمێ كر
د. عەلی تەتەر، پارێزگارێ دهۆكێ دوهی 13/11/2024 پێشوازی ل نەسرالله رەشنودی، قونسلێ بەرێ یێ كۆمارا ئیرانێ ل هەولێرێ و شاندێ د گەل دا كر.
د هەڤدیتنەكێ دا بەحسێ ب دوماهی هاتنا كار و ئەركێن رەشنودی ل هەرێما كوردستانێ و رەوشا دەڤەرێ و سەركەفتنا پرۆسێسا هەلبژارتنێن پەرلەمانێ كوردستانێ و پەیوەندیێن دێرین یێن فەرهەنگی و كلتۆری و ئابووری و بازرگانی د ناڤبەرا كۆمارا ئیرانێ و هەرێما كوردستانێ دا هاتە كرن.
قونسلێ ئیرانێ ل هەولێرێ سوپاسیا سەركردایەتیا هەرێما كوردستانێ و پارێزگارێ دهۆكێ كر، هەمبەر وێ هاریكاری و هەڤكاریا هەڤپشك یا ل چار پێنج سالێن بۆری ل گەل قونسل و قونسلخانا ئیرانێ هاتیە كرن و خواست ئاستێ وێ هەڤكاریا هەڤپشك پتر گەشێ بكەت.
پارێزگارێ دهۆكێ خوشحالیا خۆ ب سەرەدانێ و هەبوونا پەیوەندیێن خورت د ناڤبەرا هەدو لایان دا دیاركر و دەستخوشی ل قونسلێ ئیرانێ ل هەولێرێ كر هەمبەر كار و خزمەتا وی ل هەرێما كوردستانێ و خەلاتەكێ رێزگرتنێ پێشكێشی ناڤبری كر و هیڤی یا سەركەفتنێ بۆ خواست.
