پارێزگارێ دھۆکێ سۆزادیە کێشێن یانا ئافرەتێن دھۆکێ چارەسەربکەت
ئەڤرۆ، زنار زوبێر:
دوھی ل بارەگایێ خوە پارێزگارێ دھۆکێ عەلی تەتەر تیما فۆتسالا یانا ئافرەتێن دھۆکێ خەلاتکرن دەرئەنجامێ بدەستڤەئینانا ناسناڤێ ئێکێ یێ خولا پلا نایابا کوردستانێ، د رێ ورەسمەکی دا ئەوا ب بەرھەڤبوونا خەلیل حەسەن رێڤەبەرێ رێڤەبەریا وەرزشی ل پارێزگەھا دھۆکێ و کارگێر و یاریزانێن یانا ئافرەتێن دھۆکێ ھاتیە کرن.
ل دەستپێکێ پارێزگارێ دھۆکێ پیروزباھیا قارەمانا کوردستانێ کر و گوت: بدەستڤەئینانا ناسناڤی ب ئاست و ئەنجام و گیانێ مەزن یێ وەرزشی جھێ دەستخووشیێ یە و ژ ھەژی نە، خوزی سیاسەتمەدارێن مە ژی چاڤ ل ھەوە کربا ژلایێ گیانێ وەرزشی ڤە، دلخووشم کو چڤاکێ مە یێ پارێزگەھێ رێک دایە ئافرەتان وەرزشێ بکەن و ھەروەسا ھەبوونا ژمارەکا باش یا یاریزانێن پارێزگەھێ ل یانێن دی یێن عیراقێ پێنگاڤەکا باشە، ھیڤییا مە ئەوە قەیرانا دارایی کارتیکرنێ لسەر پرۆسەیا وەرزشی نەکەت و بەردەوامبیت ژبۆ پێشێخستنێ، سۆزبیت لدیڤ شیانا بەردەوام پشتەڤانیا وەرزشێ بکەین و کێشێن یانا ئافرەتێن دھۆکێ چارەسەربکەین.
ژلایێ خوەڤە خەلیل حەسەن رێڤەبەرێ وەرزشی ل پارێزگەھێ دەستخووشیا پارێزگارێ دھۆکێ کر کو ب شێوێ مادی و مەعنەوی پشتەڤانیا وەرزشێ و ھەموو یانا دکەت بیێ جوداھی و پیروزباھیا قارەمانێن خولێ کر.
ژلایەکێ دیڤە سەرۆکا یانا ئافرەتێن دھۆکێ جریسک یونس سۆپاسیا پارێزگارێ دھۆکێ کر کو پشتەڤانیا ھەموو یانێن وەرزشی دکەت و رێز ل قارەمانان گرتی و ھیڤی خواست زێدەتر پشتەڤانی بھێتەکرن ژبۆ پێشێخستنا وەرزشا ئافرەتان ل پارێزگەھا دھۆکێ.
