پارێزگار بۆ رێڤه‌به‌رێن ناوچه‌داریان: دڤێت ل گه‌ل وه‌لاتیان دراستگۆ بن و رۆتینێ كێم بكه‌ن
ئه‌ڤرۆ:
د. عه‌لی ته‌ته‌ر، پارێزگارێ دهۆكێ دوهی29/8/2021 ل كوچكا مێهڤانداریا سه‌رپه‌رشتیا كۆمبوونه‌كا ئاسایی ل گه‌ل رێڤه‌به‌رێن ناوچه‌داریێن سه‌ر ب ده‌ڤه‌رداریێن پارێزگه‌ها دهۆكێ ڤه كر.
پارێزگارێ دهۆكێ د كۆمبوونێ دا به‌حسێ به‌رنامێ كابینا نه‌هێ یا حوكمه‌تا هه‌رێما كوردستانێ بۆ گه‌هاندنا پرۆژێن خزمه‌تگۆزاری بۆ هه‌موو ده‌ڤه‌رداریێن سه‌ر ب پارێزگه‌هێ ڤه و گۆت: “حوكمه‌تا هه‌رێمێ ل سه‌ر بودجا خوه گه‌له‌ك پرۆژه ئه‌نجامداینه و ل به‌ره گه‌له‌ك پرۆژێن دی ژی ئه‌نجام بده‌ت، ئه‌م بزاڤێ دكه‌ین پرۆژه ب یه‌كسانی بگه‌هنه هه‌موو خه‌لكێ پارێزگه‌هێ”.
پارێزگاری دیار كر كو هه‌ر ده‌ما بودجا گشتی یا عیراقێ كه‌فته د وارێ بجهئینانێ دا هژماره‌كا دی یا پرۆژان ل سه‌ر بودجا گه‌شه‌پێدانا هه‌رێمان دێ ل سه‌رانسه‌ری پارێزگه‌هێ هێنه ئه‌نجامدان.
د لایه‌كێ دی یێ كۆمبوونێ دا پارێزگارێ دهۆكێ ته‌كه‌ز كر كو دڤێت رێڤه‌به‌رێن ناوچه‌داریان دراستگۆ بن و پتر خوه نێزیكی خه‌لكی بكه‌ن و پێدڤیێن وه‌لاتیان ژ پرۆژێن خزمه‌تگۆزاری بزانن و پێگریێ ب ده‌وامێ بكه‌ن و رۆتینێ د برێڤه‌برنا معاملێن وه‌لاتیان دا كێم بكه‌ن و قانوونێ بجه بینن، زێده‌گاڤیان نه‌هێلن و پرۆژێن خزمه‌تگۆزای به‌رچاڤ بكه‌ن، هه‌روه‌سا هه‌ڤكاریێ ل گه‌ل تیمێن كومسیۆنا هه‌لبژارتنان بكه‌ن و خه‌لكی هان بده‌ن كو كارتێن خوه یێن ده‌نگدانێ وه‌ربگرن بۆ وێ یه‌كێ بشێن پشكداریێ د هه‌لبژارتنێن په‌رله‌مانێ عیراقا فیدرال دا بكه‌ن.
دیسا هه‌ر دوهی د. عه‌لی ته‌ته‌ر، پارێزگارێ دهۆكێ كۆمبوونه‌ك ل گه‌ل لژنا دابینكرنا پێدڤیێن ئیدارێن سه‌ربخوه یێن زاخۆ و سۆران ب به‌رهه‌ڤبوونا ده‌ڤه‌ردارێ زاخۆ ئه‌نجام دا و هه‌لسه‌نگاندن بۆ پێدڤیێن ئیدارا زاخۆ هاتنه‌كرن و بڕیار دا پێدڤیێن ئاڤاهی و ئیداری یێن قه‌زایێن زاخۆ و باتیفا و ناوچه‌داریا بێگۆڤا بهێنه دابینكرن.
دیسا هه‌ر دوهی د. عه‌لی ته‌ته‌ر، پارێزگارێ دهۆكێ كۆمبوونه‌ك ل دۆر زێده‌گاڤیێن ل سه‌ر ئه‌ردێ چاندنێ و دارستان و پاوان و جهێن گه‌شتیاری و شوونواری یێن سنوورێ ناوچه‌داریا زاویته ئه‌نجام دا.
