پارێزگه‌ها دهۆكێ هه‌وا كۆمكرنا هاریكاریان بۆ زیانڤێكه‌فتیێن هه‌ولێرێ راگه‌هاند
دهۆك، نه‌وزاد هلۆری:
پارێزگارێ دهۆكێ كۆمبوونه‌كا تایبه‌ت ده‌رباره‌ی راگه‌هاندنا هه‌وا كۆمكرنا هاریكاریان بۆ زیانڤێكه‌فتیێن هه‌ولێرێ ل دیوانا پارێزگه‌ها دهۆكێ ب به‌رهه‌ڤبوونا ئێكه‌تیا به‌لێنده‌ران و وه‌به‌رهێنه‌رێن دهۆكێ و ژوورا بازرگانی و رێڤه‌به‌ریا به‌رسڤدانا قه‌یرانان ئه‌نجام دا و تێدا بڕیار هاته‌دان بۆ ده‌ما حه‌فت رۆژان هاریكاری بۆ زیانپێكه‌فتیێن هه‌ولێرێ بهێنه كۆمكرن.
د. عه‌لی ته‌ته‌ر، پارێزگارێ دهۆكێ د كۆنگره‌كێ رۆژنامه‌ڤانی دا دیار كر كو ئه‌و سه‌ره‌خوشیێ ل قوربانیێن هه‌ولێرێ دكه‌ن و گوت: “هه‌وا كۆمكرنا هاریكاریان دێ ل دو جهان هێته كرن، ئێك: ل ئاڤاهیێ پارێزگه‌ها دهۆكێ، هاریكاریێن مادی دێ هێنه كۆمكرن، دو: ل ئاڤاهێ رێڤه‌به‌ریا كۆچ و كۆچبه‌ران، هاریكاریێن كه‌لوپه‌لان دێ هێنه كۆمكرن، ئه‌ڤ هه‌وه دێ ب رێیا لژنه‌كێ بیت، كو ئه‌ز ب خوه دێ سه‌رپه‌رشتیێ بۆ كه‌م و دێ بۆ ده‌ما حه‌فت رۆژان یا به‌رده‌وام بیت”.
زێده‌تر گوت: “خه‌لكێ شه‌ره‌فمه‌ندێ هه‌ولێرێ د ده‌مێ خوه دا گه‌له‌ك هاریكاریا خه‌لكێ ده‌ڤه‌را به‌هدینان كریه، له‌وا دڤێت ئه‌م وه‌كو خه‌لكێ دهۆكێ هاریكاریا وان بكه‌ین، هاریكاریێن خه‌لكێ هه‌ولێرێ چو جاران ژ بیرا مه ناچن، ب تایبه‌تی پشتی ئه‌نفالان، له‌و پێدڤیه ئه‌م ژی هاریكاریا وان بكه‌ین”.
شه‌ڤا ئه‌ینییا بۆری ژ ئه‌گه‌رێ بارانان له‌هی ل چه‌ند ده‌ڤه‌رێن جودایێن هه‌رێما كوردستانێ دروست بوون، ب تایبه‌تی ل هه‌ولێرێ كو تێدا 11 كه‌سان گیانێ خوه ژ ده‌ست دا و پتری 500 خانی و دوكان و ترومبێلێن وه‌لاتیان ژی زیان گه‌هشتیێ.
