پارێزگەها دهۆكێ ب پلا دویێ بۆ هشكەسالیێ دهێت
هەولێر، قائید میرۆ:
پەیڤدارێ وەزارەتا چاندنێ دیار كر، مەترسیێن هشكەسالیا وەرزی ل سەر هەژمارەكا دەڤەرێن پارێزگەهێن هەولێر و دهۆكێ هەنە و دبێژیت: هەتا نوكە رێژەیا پێدڤی یا بارانێ نەباریە و زیانێن مەزن گەهاندینە بەرهەمێ جۆتیاران.
هیوا عەلی، پەیڤدارێ وەزارەتا چاندنێ بۆ رۆژناما ئەڤرۆ خویاكر، مەترسیێن هشكەسالیێ ل سەر هەژمارەكا دەڤەرێن هەرێما كوردستانێ هەنە و ب پلا ئێكێ مەترسی ل سەر هەولێرێ هەیە و پارێزگەها دهۆكێ ژی ل پلا دویێ دهێت و گۆت: «هەتا نوكە رێژەیا پێدڤی یا بارانێ ل هژمارەكا دەڤەران نەباریە و زیانێن مەزن گەهاندینە بەرهەمێ جۆتیاران، ب تایبەتی بەرهەمێ گەنمی، دەركرنا بڕیارا هشكەسالیێ د دەستێ حكومەتێ دایە و ئەڤا هەتا نوكە هەی، ب تنێ هشكەسالیا وەرزیە».
هیوا عەلی گۆتژی: «ل گورەی ستانداردێن هاتینە دیاركرن، پێدڤیە هەرسال رێژەیا بارانێ بۆ گەهشتن ب ئاستێ پێدڤی 350 هەتا 400 ملیمێن بارانێ ب بارن، هەتا پشتڕاستبین مەترسی نینە، لێ هەتا نوكە رێژەیا بارانێ ل دەشتا هەولێرێ و هندەك دەڤەرێن دهۆكێ گەلەك یا كێمە، هەرچەندە دهێتە پێشبینیكرن ل مەها نیسانێ باران بباریت».
