پارێزەرەک: ژن هه‌بوویه ژبەر سناپه‌كی هاتیه بەردان
هه‌ولێر، قائید میرۆ:
بسپۆره‌كێ تاوان ناسیێ بۆ رۆژناما ئەڤرۆ دیار کر کو رێژه‌یا ته‌لاقێ ل هه‌رێما كوردستانێ د زێده‌بوونێ دایه و پڕانیا كه‌سێن سه‌ره‌دانا دادگه‌هێ دكه‌ن و داخوازا جودابوونێ دكه‌ن گه‌نجن و گۆت: ئه‌گه‌رێن زێده‌بوونا رێژەیا ته‌لاقێ زۆرن، به‌لێ هنده‌ك ئه‌گه‌رێن سه‌ره‌كی هه‌نه ژ وان ژی نه‌بوونا مالا جودا.
پارێزەر عه‌لی سه‌لیم بابان، بسپۆرێ تاوان ناسیێ دیار كر، رێژه‌یا ته‌لاقێ سال بۆ سالێ ل هه‌ریما كوردستانێ به‌ر ب زێده‌بوونێ یه، هەکە بتنێ پارێزگه‌ها هه‌ولێرێ وه‌ك نموونه به‌حس بكه‌ین، ل گوره‌ی ئامارا جڤاتا دادوه‌ریێ سالا بۆری 2024ێ ل پارێزگه‌ها هه‌ولێرێ ١٧ هزار گرێبه‌ستێن هه‌ڤژینیێ ل دادگه‌هێن هه‌ولێرێ هاتینه تۆمار كرن، به‌لێ د هه‌مبه‌ردا بتنێ سالا بۆری شه‌ش هزار حاله‌تێن ته‌لاقێ هاتینه تۆماركرن و گۆت: ل پارێزگه‌هێن دیتر ژی ب هه‌مان شێوه رێژه‌یا ته‌لاقێ زۆر یا بلنده و جهێ مه‌ترسیێ یه، چونكه هژمارا گرێبه‌ستان یا دیاره و یا ته‌لاقێ ژی یا دیاره.
عەلی بابان د بەردەوامیا ئاخفتنێن خۆدا گۆت: بێگومان ئه‌گه‌رێن زێده‌بوونا رێژه‌یا ته‌لاقێ زۆرن و دیارن، به‌لێ ئه‌و ئه‌گه‌رێ زێده دیار و ل دادگه‌هێ ئه‌م دبینین نه‌بوونا مالا جودا و سه‌ربخۆیە، ژبەرکو هەکە ژن و زه‌لاما مالا سه‌ربخۆ نه‌بوو دێ كه‌سێن دی هێنه دناڤا ژیانا وان و مایتێکرن هێته كرن و ئه‌ڤه‌ژی دبیته ئه‌گه‌رێ ته‌لاقێ.
بسپۆرێ تاوان ناسیێ دیار کر ژی کو د ده‌مه‌كی دا و ل گوره‌ی قانوونێ و شه‌ریعه‌تی ژی ژنێ ماف هه‌یه ببیته خودان مالا سه‌ربخۆ هەکە بچیته د پرۆسا هه‌ڤژینیێ دا، هه‌روه‌سا ئه‌گه‌رێن دیژی هه‌نه ژ وانا مایتێکرنا كه‌سێن ده‌وروبه‌ر و ره‌وشا ئابوری و سۆشیال میدیا و گۆت: (مه چه‌ندین نمونه هه‌نه ل سه‌ر سناپه‌كێ ژن هاتیه ته‌لاقدان، ئیدی ئه‌گه‌ر و نموونه زۆرن و مخابن گه‌هشتیه ئاسته‌كێ مه‌ترسیدار ژن لسه‌ر سناپه‌كێ یان هنارتنا ئه‌ده‌كێ بهێته ته‌لاقدان و ماله‌ك تێك بچیت.
پارێزه‌ری گۆتژی: زۆربه‌یا وان ته‌لاقێن دهێنه دادگه‌هێ و تۆماركرن، گه‌نجن و ته‌مه‌نێ وان دناڤبه‌را 20 هه‌تا 25 سالێی دایه، ته‌مه‌نێ هه‌ڤژینیا وانژی زۆرێ كێمه هه‌یڤه‌كه یان دو هه‌یڤن یانژی ساله‌كه زۆر زۆر بیت ته‌مه‌نێ هه‌ڤژینیا وان ناگه‌هیته پێنج سالان، ئەو هەڤژینێن تەمەنێ وان مەزن زۆر كێم دهێنه تۆماركرن و ته‌لاقدان.
لدۆر ئینانا هه‌ڤژینان ب دزیڤه عه‌لی سه‌لیم بابان دا زانین کو ل گوره‌ی قانوونا بارێ كه‌سی یا سالا 1959ێ هاتیه ده‌ركرن، ژن ئینان ب دزیڤه دو حاله‌تن یان ژن ئینایه و ل دادگه‌هه‌كا ده‌رڤه‌ی هه‌رێما كوردستانێ گرێبه‌ست تۆمار كریه یانژی ژن ئینایه و نه‌چوویه دادگه‌هێ و گۆت: ئه‌ڤێن هه‌ڤژینا دویێ ب دزیڤه دئینن و ل دادگه‌هێن ده‌رڤه‌ی هه‌رێما كوردستانێ مەهر دكه‌ن، دادگه‌هێن هه‌رێمێ نه‌شێن ئه‌ڤێ گرێبه‌ستێ ره‌ت كه‌ن، چونكه ل دادگه‌هێ ده‌رچوویه، به‌لێ هه‌ڤژینا ئێكێ دشێت وه‌كی به‌لگه بۆ ته‌لاقێ بكار بینیت، به‌لێ ئه‌ڤێن ب دزیڤه هه‌ڤژینا دویێ مه‌هر دكه‌ن و نه‌چووینه چو دادگه‌هان ژی ئه‌ڤه تاوانه و هه‌ڤژینا ئێكێ ماف هه‌یه سكالایێ تۆمار بكه‌ت و داخوازا مافێ خۆ بكه‌ت.
