پارەیێ جۆتیارێن دهۆكێ و هەولێرێ ب ئێك گوژمە بهێتە مەزاختن
هەولێر، قائید میرۆ:
رێڤەبەرێ گشتیێ بازرگانی ل وەزارەتا بازرگانی و پیشەسازیا حكومەتا هەرێما كوردستانێ دیاركر، دەست ب بەلاڤكرنا پارەیێ گەنمێ جۆتیاران هاتیە كرن و مە داخوازكریە پارەیێ جۆتیارێن هەردو پارێزگەهێن هەولێر و دهۆكێ ب ئێك گوژمە بهێتە بەلاڤكرن، بەلێ هێشتا دیار نینە دێ كەنگی دەستپێكەت.
نەوزاد شێخ كامل، رێڤەبەرێ گشتیێ بازرگانی بۆ رۆژناما ئەڤرۆ دیاركر، دوهی ل سنۆرێ پارێزگەهێن سلێمانی و هەلەبجە و هەردو ئیدارەیێن راپەڕین و گەرمیان دەست ب بەلاڤكرنا پارەیێ گەنمێ جۆتیاران هاتە كرن، بەلێ دیارنینە ل پارێزگەهێن دهۆك و هەولێرێ كەنگی دێ پارەیێ جۆتیاران هێتە بەلاڤكرن و گۆت: «سالێن بۆری پارەیێ گەنمێ جۆتیارێن دهۆك و هەولێرێ ژ ئالیێ بەنكا ناڤەندی لقێ هەولێرێ دهاتە بەلاڤكرن، بەلێ ئەڤ سالە ژ ئالیێ بانكا بازرگانی دێ پارەیێ جۆتیاران هێتە مەزاختن، لەوڕا ژی مە داخوازكریە ب ئێك گوژمە پارەیێ جۆتیارێن هەولێر و دهۆكێ بهێتە مەزاختن».
نەوزاد شێخ كامل گۆتژی: «ئەڤ سالە وەزارەتا بازرگانیا ئیراقێ 57 ملیار دینار وەكو شایستەیێن جۆتیارێن هەرێما كوردستانێ مەزاختینە و بەهرا هەر پارێزگەهەكێ ژی هاتیە دیاركرن، بەهرا پارێزگەها سلێمانی و هەلەبجە 25 ملیار دینار و 20 ملیار دینار بۆ پارێزگەها هەولێرێ و 12 ملیار دینار ژی بۆ جۆتیارێن پارێزگەها دهۆكێ نە».
