پاشخستنا سزایێن ل سەر پاریس ئێکەتیا ئوروپی ریال مەدرید ب گۆمان خستیە !
ئەڤرۆ نیوز:
ئێکەتیا تەپاپێ یا ئوروپی یوێفا بریاریێن دەربارەی سزادانا یانا پاریس سان جێرمان یا فرەنسی پاشخستن بۆ رۆژا دوشەمبیا بھێت، و کارگێریا ریال مەدرید ژی بۆ وەرگرتنا دەلیڤێ ژ ڤێ بریارێ ب گۆمان ئێخستیە.
فلرونتینو پێرێز سەروکێ یانا ریال مەدرید یا ئسپانی ھەتا نوکە یێ ل ھیڤیا وێ چەندێ یانا پاریس سان جێرمان بھێتە سزادان ژبەر سەرپێچیا قانوونێن یوێفایێ یێن دارایی کریە ئانکو یاریا پاقژ ژبەرکو مەزاختیێن وێ ژ داھاتێ وێ زێدەترە و ئەڤ چەندە ژی دبیتە سەرپێچی بەرامبەر بریارێن یوێفایێ، لێ بریارا پاشخستنا سزادانا یانا پاریس سان جێرمان بۆ رۆژا دوشەمبی کارگێریا یانا مەلەکی دلگران کریە ژبەرکو ھوسا دبینت ئەڤ سزایە تنێ دێ یێن دارایی بن و نە زێدەتر وەکی بەری نوکە ل سالا ٢٠١٤ دەمێ یانا مانچستەر ستی ئەڤ سەرپێچیە کری و تنێ سزایێ وێ دارایی بوو لەورا پێشبینی دھێتە کرن سزادانا پاریس سان جێرمان یا فرەنسی ژی يا سڤک بيت و دبیت تنێ ڤێ یانێ نەچار بکەن ھەڤبەستێ دگەل کیلیان مباپی ئیمزا نەکەن و بھێتە ڤەگەریان بۆ یانا موناکو ژبەرکو بەری نوکە ب شێوازێ قەر چویە پاریس سان جێرمان بۆ ماوێ سالەکێ بەرامبەر مافێ کرینێ پشتی ب دوماھی ھاتنا ڤی قەری.
ژلایێ خوە ڤە راپورتێن رۆژنامەڤانی یێن ئسپانی ھوسا خویاکریە ئەگەر ریال مەدرید نەشیا ل ھاڤینا ئەڤ سالە ھەڤبەستێ دگەل کیلیان مباپی ئیمزا بکەت ل سالا بھێت دێ ھەڤبەستا یاریزانێ بەرازیلی نیمار داسێلڤا ئێمزا کەت.
