پاشمایێن شه‌ڕی ل شنگالێ دیار دبن
ل ده‌مه‌كی ئێزدیێن شنگالێ و ده‌ردور راستی هێرشێن رێكخراوا تیرۆرستی بووینه و مال و مولكێن خوه هێلاینه و ده‌ربه‌ده‌ر بووینه و هێشتا شوونوارێن زۆلما تیرۆرستان لێ دیاره و كه‌فتینه د كه‌مپان دا و راستی چه‌ندین ئاریشێن جڤاكی بووینه و ژ هه‌می ئالیان ڤه و د هه‌می واران دا پێدڤی ب هاریكاریێن مرۆڤی یێن رێكخراوێن مرۆڤی ب سه‌رپه‌رشتیا نه‌ته‌وێن هه‌ڤگرتی هه‌یه، مخابن ئه‌م دبینین د ناڤ خیڤه‌تگه‌ه و كه‌مپان دا پێشێلكاری د ده‌رحه‌قێ ئێزدیێن ده‌ربه‌ده‌ر دهێته كرن، كو مه‌ترسیا وان پێشێلكاریان كێمتر نینه ژ زۆلما داعش ب سه‌رێ ملله‌تێ ئێزدی ئینای، جاره‌كا دی دبێژم مخابن كو هنده‌ك ئالی و رێكخراوێن مه‌سیحی یێن ته‌بشیری ژ ده‌رڤه‌ی وه‌لاتی دهێن و ره‌وشا ئابووریا لاواز د كه‌مپان دا بۆ خوه ب ده‌لیڤه دزانن كو هاریكاریان هه‌مبه‌ری گهۆرینا ئول و بیروباوه‌رێن ئێزدیان به‌لاڤ دكه‌ن.
بێگومان هه‌ر ملله‌ته‌كێ راستی هێرشه‌كا درنده و به‌ربه‌ری ببیت دێ ره‌وشا وان ژ ئالیێ ده‌روونی و ئابووری و ژیارێ ڤه یا ئالۆز بیت، ئه‌ڤجا ڤان رێكخراوێن ته‌بشیری ئه‌ڤ ره‌وشه بۆ خوه ب ده‌لیڤه زانیه و بزاڤان دكه‌ن كو ب رێیا دیڤه‌لانكێن خوه و پێشكێشكرنا هاریكاریان و ب رێیا ڤه‌كرنا خولێن ره‌وشه‌نبیری بیروباوه‌رێن ئێزدیان لاواز بكه‌ن و بگهۆرن. ئه‌ڤ بزاڤه مه‌ترسیترین كاره كو د ره‌وشێن هوسا دا بزاڤ دهێته كرن كو ملله‌ت بیروباوه‌ر و دابونه‌ریتێن خوه بگهۆرن. كار و بزاڤێن ژ ڤی جۆری هه‌مبه‌ری وان ملله‌تان دهێنه كرن كو راستی هه‌ژاریێ دبن یان دكه‌ڤنه د شه‌ڕی دا، بێگومان پڕانیا ده‌وله‌تێن ده‌ڤه‌رێ و ژ وانا عیراق راستی گه‌فێن مه‌ترسیترین رێكخراوا تیرۆرستی بووینه، ئه‌ڤجا نه‌تشته‌كێ سه‌یره هه‌كه ئه‌ڤ جۆره بزاڤه بهێنه‌كرن، لێ ل هه‌مان ده‌می پێدڤیه ل سه‌ر حوكمه‌تا هه‌رێما كوردستانێ و ئالیێن ئه‌منی یێن په‌یوه‌ندیدار ل ده‌ڤه‌رێ نه‌هێلن ئه‌ڤ جۆره چالاكیێن كرێت و مه‌ترسیدار بهێنه‌كرن، چونكێ دێ ره‌وشا ناڤخۆیی و به‌رژه‌وه‌ندیێن پێكهاتێن هه‌رێمێ ئالۆز كه‌ن و تێك ده‌ن.
هزرا هاتنا ڤان رێكخراوێن ته‌بشیری بۆ ناڤ كه‌مپ و خیڤه‌تگه‌هێن ده‌ربه‌ده‌رێن ئێزدی نه ژ ڤالاتیه‌كێ هاتیه، به‌لكو ب دیراسه و پلانێن خورت هاتیه كرن، و گومان تێدا نینه كو ئه‌ڤ رێكخراوێن ڤی كاری دكه‌ن سه‌ر ب ئالیێن سیاسیێن مه‌زن ڤه‌نه و ب پلان بۆ وان وه‌لات و جهان دهێنه هنارتن كو ئاریشه و ئالۆزیێن سیاسی لێ هه‌نه، له‌ورا پێدڤیه ل سه‌ر ملله‌تێ مه یێ ئێزدی د هشیاربن و ل دووڤ ڤان رێكخراوا نه‌چن و نه‌هێنه سه‌ردابرن، چونكی رێكخراوا داعش كو ب ناڤێ ده‌وله‌تا ئیسلامی هاتیه د مه‌یدانێ دا و زارۆك و كچ و ژن و گه‌نج و پیرێن مه كوشتن و ده‌ربه‌ده‌ر كرن و ئه‌ڤ رێكخراوێن مه‌سیحی ب ناڤێ هاریكاریان دخوازن بیروباوه‌رێن مه بگهۆرن، ئه‌ڤجا چ جوداهی د ناڤبه‌را وان دا نینه، به‌لكو رێكخراوێن ته‌بشیری مه‌ترسیدارترن، بیرا مه دهێت كو ل ده‌ستپێكا سالێن نۆتان ژ چه‌رخێ بۆری ده‌مێ مه كۆچ كریه ئورۆپا و پشتی ئه‌م هاتینه بجهكرن هه‌مان بزاڤ ژ ئالیێ رێكخراوێن ته‌بشیری ڤه هاتنه‌كرن و ره‌وشا مه و نه‌زانینا مه یا زمانێن ئورۆپی بۆ خوه ب ده‌لیڤه زانی و سه‌ره‌دانا كه‌مپێن ئاواران دكر و پرتووك و به‌لاڤوكێن گرێدایی ئایینێ مه‌سیحی ل سه‌ر مه به‌لاڤ دكرن و ل گه‌له‌ك ده‌وله‌تان خه‌لكه‌ك هه‌بوو ل دووڤ وان دچوو و دهاتنه سه‌ردابرن.
ئه‌ڤجا ل سه‌ر ته‌خا ره‌وشه‌نبیرا ئێزدی پێدڤیه رۆله‌كێ چالاك و كاریگه‌ر هه‌مبه‌ری ڤان بزاڤێن ته‌بشیری هه‌بیت و پێدڤیه خولێن پێگه‌هاندنا ره‌وشه‌نبیریێ ل هه‌می كه‌مپان ڤه‌كه‌ن و ملله‌تێ مه‌یێ ئێزدی هشیار بكه‌ن، هه‌روه‌سا ل سه‌ر هه‌می سازیێن په‌یوه‌ندیدار پێدڤیه نه‌هێلن ئه‌ڤ جۆره بزاڤه بهێنه‌كرن.
و: ئه‌ڤرۆ
