پاشه‌رۆژا ئمبراتۆریا ترۆمبێلێن یابانی یا د مه‌ترسیێ دا
پشتی وه‌لاتێ چینێ، بازارێ ترۆمبێلان و ب تایبه‌ت ترۆمبێلێن كاره‌بایی داگیركری، نها ئمبراتوریا یابان یا د مه‌ترسیێ دا.
ب گۆره‌یی نووچه‌یێن ده‌نگوباسان یێن گرنگیێ ب ترۆمبێلان دده‌ن، به‌حس ل وێ چه‌ندێ دكه‌ن كو نها بازارێ ترۆمبێلێن كۆمپانیا نیسان یا یابانی به‌ر ب نه‌مانێ چوویه، دبێژن ژی دبیت نه‌چار ببیت ل گه‌ل هوندای ببنه ئێك و به‌حس ل وێ چه‌ندێ دهێته كرن، میتسیوبۆشی ژی بچیته ل گه‌ل وان.
هه‌كه ئه‌ڤ هه‌رسێ كۆمپانیه ئێك بگرن، دێ دشیان دابیت، سالانه هه‌شت ملیۆن ترۆمبێلان بێخنه بازارێن جیهانێ و ب ڤێ چه‌ندێ ژی دبنه خودانێن پرفرۆشترین كۆمپانیا ترۆمبێلان ل جیهانێ پشتی تیوتا و ڤولكسوایگن.
به‌لێ د سه‌ر ڤێ چه‌ندێ را دبیت نه‌شێت خوه ژ هه‌موو ئاسته‌نگان ده‌ربێخین، خوه هه‌كه ئێك بگرن ژی، ژ به‌ر كو هه‌موو كۆمپانیێن مه‌زن یێن جیهانی نها ل بن گه‌فه‌كا مه‌زنن كو ئه‌و ژی دبێژنێ شوره‌شا نوو یا ترۆمبێلێن چینی.
وه‌لاتێ چینێ د ماوێ ڤان ده‌هـ سالان دا، شیا دربه‌كێ گه‌له‌ك مه‌زن بدانیته كۆمپانیێن مه‌زن یێن جیهانێ و سه‌ركێشێن وان وه‌لاتێن ئه‌مریكا و یابان و ئه‌لمانیا و ئیتالیا.
هه‌كه كۆمپانیا نیسان بكه‌ینه نموونه كوخودان مێژوویه‌كا كه‌ڤن و ب ناڤوده‌نگه، د ماوێ نه‌هـ هه‌یڤێن بوری دا، شیایه دو ملیۆن و 500 هزار ترۆمبێلان بفرۆشیت، د به‌رامبه‌ر دا كۆمپانیا بی وای دی ئه‌ڤا ڤان سالێن دووماهیێ هاتیه د بازاری دا، د هه‌مان دا و د هه‌مان ماوه دا شیایه دو ملیۆن و 750 هزار ترۆمبێلان ب فرۆشیت.
ب گۆره‌ی نووچه‌كێ ئاژانسا رویته‌رز، كۆمپانیا ڤۆلكس وایگن یا ئه‌لمانیا كو خودانا ترۆمبێلێن هه‌ر ئێك ژ ئودی و پۆرش و لامبورگینی و بێنتلی یه، دبیت دو ژ كۆمپانیێن خوه ب دایخیت. ل وه‌لاتێ ئه‌مریكا ژی یا بێ بار نینه ژ ڤێ مه‌ترسیا مه‌زن، د راپرسیه‌كێ دا، دیار بوویه، خودانێن ترۆمبێلێن كاره‌بای ژ هه‌ر ده‌هـ كه‌سان، حه‌فت د ئاماده‌نه ترۆمبێلێن چینی بكرن، هه‌ر ژ به‌ر تایبه‌تمه‌ندیێن زۆر یێن ڤان ترۆمبێلان و هه‌ر ژی ژ به‌ر گۆنجاتیا بهایێ وان.
بۆ زانین ل سالا بوری وه‌لاتێ چینێ شیایه زێده‌تری 19 ملیۆن ترۆمبێلان به‌رهه‌م بینیت كو زێده‌تر یێن كاره‌بای نه و ئه‌ڤه ژی ب رێژا نێزیكی 3% ژ سالا به‌ری زێده‌تر، ئانكو به‌رده‌وام پێشكه‌فتنا چینێ د وارێ ترۆمبێلان دا د زێده‌بوونێ دا.
