پانزین ب ره‌نگه‌كێ به‌رچاڤ گران بوو
ئه‌ڤرۆ، نه‌وزاد هلۆری:
دوهی ب ره‌نگه‌كێ به‌رچاڤ ل پانزینخانێن سنوورێ پارێزگه‌ها دهۆكێ لیترا پانزینێ گران بوو، نوونه‌رێ پانزینخانه‌كێ ژی دده‌ته دیاركرن كو چه‌ند رۆژێن بهێن ئه‌گه‌ر هه‌یه پانزین هێشتا گران ببیت.
ئه‌حمه‌د شنگالی، نوونه‌رێ پانزینخانا مه‌تین دو ل دهۆكێ بۆ رۆژناما ئه‌ڤرۆ گۆت: “دوهی و ئه‌ڤرۆ ژی هه‌مبه‌ر چه‌ند رۆژێن بۆری، بهایێ لیترا پانزینێ ب ره‌نگه‌كێ به‌رچاڤ بلند بوویه و دهێته پێشبینیكرن ئه‌ڤ بلندبوونه یا به‌رده‌وام ژی بیت”.
زێده‌تر گۆت: “چه‌ند رۆژێن بۆری ده‌ورۆبه‌رێن 750 دیناران لیتر دهاته فرۆتن، به‌لێ دوهی هه‌ر لیتره‌ك ب 850 دیناران دهاته فرۆتن، چه‌ند رۆژێن بهێن ئه‌گه‌ر هه‌یه بهایێ لیترا پانزینا نورمال بگه‌هیته 900 دیناران”.
ناڤبری ل دۆر ئه‌گه‌رێن گرانبوونا بهایێ لیترا پانزینێ ژی گۆت: “پانزینا ئیرانی ناهێته هه‌رێما كوردستانێ و پانزینا كار ژی كێمه، دیسا ئه‌و پشكا هه‌رێمێ یا ل چه‌ند رۆژێن بۆری ل به‌غدا ژی دهات ئه‌و ژی گه‌له‌ك كێم بوویه، ژ به‌ر ڤێ چه‌ندێ پانزین گران بوویه، ره‌نگه قه‌ره‌بالغ و سرا ل وان پانزینخانان دروست ببیت كو هێشتا عمبارێن وان ئه‌و پانزینا چه‌ند رۆژێن بۆری دهات تێدا مایی”.
